హార్దిక్‌ పాండ్యాతో ఎఫైర్ రూమర్లు.. నెటిజన్‌కు అమీషా పటేల్ స్ట్రాంగ్ కౌంటర్!

బాలీవుడ్ సీనియర్ నటి అమీషా పటేల్, టీమిండియా స్టార్ క్రికెటర్ హార్దిక్ పాండ్యా మధ్య ఏదో నడుస్తోందంటూ సోషల్ మీడియాలో చెలరేగిన పుకార్లపై ఆమె తీవ్రంగా స్పందించారు. ఓ స్నేహపూర్వక సంభాషణకు రొమాంటిక్ రంగు పులిమిన నెటిజన్‌కు తనదైన శైలిలో గట్టిగా బదులిచ్చారు.

ఇటీవల ముంబైలోని ప్రఖ్యాత తాజ్ మహల్ ప్యాలెస్ హోటల్‌లో జరిగిన ఓ కార్యక్రమానికి అమీషా పటేల్, హార్దిక్ పాండ్యా హాజరయ్యారు. అక్కడ తన స్నేహితులకు హార్దిక్‌ను పరిచయం చేస్తున్న సమయంలో అమీషా అతని భుజంపై చేయి వేశారు. ఈ దృశ్యాలున్న వీడియో ఒకటి బయటకు వచ్చి సోషల్ మీడియాలో వైరల్ అయింది. ఈ వీడియోను చూసిన ఓ 'ఎక్స్' (ట్విట్టర్) యూజర్, దానికి తనదైన భాష్యం చెప్పాడు. 

"హోటల్ పార్టీలో అమీషా పటేల్ హార్దిక్ పాండ్యా భుజంపై చేయి వేసిన తీరు చూస్తుంటే... రెడ్డిట్‌లో వస్తున్న పుకార్లు నిజమేననిపిస్తోంది" అని పోస్ట్ చేశాడు.

ఈ పోస్ట్ అమీషా దృష్టికి వెళ్లడంతో ఆమె తీవ్రంగా స్పందించారు. ఆ పోస్ట్ స్క్రీన్‌షాట్‌ను తన ఇన్‌స్టాగ్రామ్ స్టోరీలో పంచుకుంటూ వ్యంగ్యంగా సమాధానమిచ్చారు. "అవును, నువ్వు చెప్పింది నిజమే. దేవుడా... ఎంత కరెక్ట్‌గా చెప్పావు. నా చేయి అతనిపై నిజంగానే చాలా రొమాంటిక్‌గా ఉంది" అంటూ మొదట ఎద్దేవా చేశారు.

ఆ తర్వాత మరింత ఘాటుగా స్పందిస్తూ.. "నాకు నువ్వెవరో తెలియదు కానీ, నీకు కనీసం ఒక్క అమ్మాయి కూడా ఫ్రెండ్‌గా లేదని కచ్చితంగా చెప్పగలను. స్నేహితుల మధ్య ఉండే సాధారణ సంభాషణను ఇలా చూడటం సరికాదు. ఇలాంటివి పోస్ట్ చేసే ముందు ఒకరిని స్నేహితురాలిగా చేసుకోవడం మంచిది" అంటూ ఆ యూజర్‌కు గట్టిగా చురకలంటించారు.

ప్రస్తుతం హార్దిక్ పాండ్యా మోడల్ మహికా శర్మతో రిలేషన్‌షిప్‌లో ఉన్నారు. 2025లో వీరిద్దరూ తమ సంబంధాన్ని ఇన్‌స్టాగ్రామ్ ద్వారా అధికారికంగా ప్రకటించారు. అంతకుముందు అతను నటి నటాషా స్టాంకోవిచ్‌ను వివాహం చేసుకుని విడిపోయిన విషయం తెలిసిందే. ఈ నేపథ్యంలో స్నేహపూర్వక చర్యను తప్పుగా చిత్రీకరించే ప్రయత్నంపై అమీషా ఇచ్చిన ఈ ఘాటు సమాధానం ప్రస్తుతం సోషల్ మీడియాలో చర్చనీయాంశంగా మారింది.