'తెల్లకాగితం’ ఓ ఇన్నోసెంట్ ల‌వ్‌స్టోరీ.. క‌చ్చితంగా పెద్ద హిట్ అవుతుంది: దిల్ రాజు

హర్ష్ రోషన్, నక్షత్ర జంటగా నటిస్తున్న యూత్‌ఫుల్ ఎమోషనల్ ఎంటర్‌టైనర్‌ ‘తెల్లకాగితం’. ఈ సినిమా టీజర్‌ను శనివారం హైదరాబాద్‌లో ఘనంగా విడుదల చేశారు. ఈ కార్యక్రమానికి ముఖ్య అతిథిగా హాజరైన ప్రముఖ నిర్మాత దిల్‌రాజు, ఇదొక స్వచ్ఛమైన,  ఇన్నోసెంట్ ల‌వ్‌స్టోరీ అని, కచ్చితంగా పెద్ద విజయం సాధిస్తుందని ధీమా వ్యక్తం చేశారు. అక్టోబర్ 2న ఈ చిత్రం ప్రేక్షకుల ముందుకు రానుంది.

ఈ సందర్భంగా దిల్‌రాజు మాట్లాడుతూ, "తెలిసీ తెలియని వయసులో చేసే తప్పుల చుట్టూ ఈ కథ తిరుగుతుంది. తెల్లకాగితంపై ఎర్ర మచ్చ పడితే ఎలా ఉంటుందనేదే ఈ సినిమా కాన్సెప్ట్. నేను ‘కొత్త బంగారు లోకం’ తీసినప్పుడు ఎలాంటి ఫీల్ కలిగిందో, 2000ల కాలం నాటి నేపథ్యంలో వీళ్లు అలాంటి ఓ ఇన్నోసెంట్ లవ్‌స్టోరీని రూపొందించారు. యూత్‌తో పాటు కుటుంబ ప్రేక్షకులకు కూడా కనెక్ట్ అవుతుంది" అని అన్నారు.

కార్యక్రమంలో పాల్గొన్న మరో ప్రముఖ దర్శకుడు బాబీ మాట్లాడుతూ, ఈ సినిమాలో బ్లాక్‌బస్టర్‌కు కావాల్సిన అన్ని అంశాలు, అనేక లేయర్స్ ఉన్నాయని ప్రశంసించారు. రచయిత, దర్శకుడు బీవీఎస్ రవి మాట్లాడుతూ, నిర్మాత కృష్ణ కొమ్మాలపాటి ప్రొడక్షన్‌ను, పబ్లిసిటీని పక్కాగా హ్యాండిల్ చేసి ముందుకు తీసుకెళ్లే పర్‌ఫెక్ట్ ప్రొడ్యూసర్ అని, ఆయన తీసిన ఈ సినిమా బాగా ఆడాలని ఆకాంక్షించారు.

అరుణాచల క్రియేషన్స్ బ్యానర్‌పై కృష్ణ కొమ్మాలపాటి నిర్మిస్తున్న ఈ చిత్రంతో రమేష్ బండ్రెడ్డి దర్శకుడిగా, నక్షత్ర హీరోయిన్‌గా పరిచయం అవుతున్నారు. హీరో హర్ష్ రోషన్ మాట్లాడుతూ, ఇది కేవలం సినిమా కాదని, ఒక మంచి ఫీలింగ్ అని, '7G బృందావన్ కాలనీ', 'ప్రేమిస్తే' చిత్రాల కోవకు చెందిందని అన్నారు. ఈ సినిమాలో నటుడు అజయ్ ఒక కీలకమైన భావోద్వేగ పాత్రలో కనిపించనున్నట్లు చిత్రయూనిట్ తెలిపింది. నందు సవిరిగాన కథ, స్క్రీన్‌ప్లే, మాటలు అందించిన ఈ చిత్రానికి కె.వి. గుహన్ సినిమాటోగ్రఫీ, విజయ్ బుల్గానిన్ సంగీతం అందిస్తున్నారు. ఈ టీజర్ లాంచ్ వేడుకలో పలువురు సినీ ప్రముఖులు పాల్గొని చిత్ర బృందానికి శుభాకాంక్షలు తెలిపారు.