ప్రతీ కదలికను గమనిస్తున్నాం.. ఇరాన్ అణు కేంద్రంపై ట్రంప్ సంచలన వ్యాఖ్యలు

అమెరికా అధ్యక్షుడు డొనాల్డ్ ట్రంప్.. ఇరాన్‌కు మరోసారి తీవ్ర హెచ్చరికలు జారీ చేశారు. ఇరాన్‌లోని 'పికాక్స్ మౌంటెన్' అనే భూగర్భ అణుకేంద్రంపై త్వరలోనే దాడి చేసే అవకాశం ఉందని ఆయన స్పష్టం చేశారు. శుక్రవారం ఓవల్ ఆఫీస్‌లో మీడియాతో మాట్లాడుతూ, "పికాక్స్‌లో ఏదైనా అనుమానాస్పద కార్యకలాపం జరిగితే, మేము దానిపై చాలా త్వరగా దాడి చేయవచ్చు" అని వ్యాఖ్యానించారు.

పికాక్స్ అణు కేంద్రంలో ప్రతీ కదలికను అమెరికా నిశితంగా గమనిస్తోందని ట్రంప్ తెలిపారు. "పికాక్స్‌లో ఎవరు కదులుతున్నారో, ఇరాన్ వ్యాప్తంగా ఎవరు ఎక్కడ తిరుగుతున్నారో మాకు తెలుసు. ఏదైనా తప్పు జరిగితే, మేము వారిని గట్టిగా దెబ్బతీస్తాం" అని అన్నారు. గత ఐదు నెలలుగా అమెరికా చేపడుతున్న సైనిక చర్యల వల్లే ఇరాన్ అణ్వాయుధాన్ని పొందకుండా నిరోధించగలిగామని ట్రంప్ పేర్కొన్నారు.

ఏమిటీ పికాక్స్ పర్వతం?
ఇరాన్‌లోని నటాంజ్ యురేనియం శుద్ధి కేంద్రానికి సమీపంలో ఒక పర్వతాన్ని తొలిచి భూమికి 80 నుంచి 100 మీటర్ల లోతులో ఈ కేంద్రాన్ని నిర్మిస్తున్నారు. అమెరికా ప్రయోగించే శక్తిమంతమైన బంకర్-బస్టర్ బాంబులు కూడా దీనిని ఛేదించడం కష్టమని నిపుణులు అంచనా వేస్తున్నారు. 2020 నుంచి దీని నిర్మాణం జరుగుతుండగా, ఇక్కడ సెంట్రిఫ్యూజ్‌లను అసెంబుల్ చేస్తామని ఇరాన్ అంతర్జాతీయ అణు ఇంధన సంస్థ (ఐఏఈఏ)కు గతంలో వెల్లడించింది.

పాత హెచ్చరికలే.. కొత్త ఉద్రిక్తతలు
ట్రంప్ ఈ స్థావరంపై హెచ్చరికలు చేయడం ఇదే మొదటిసారి కాదు. ఈ ఏడాది జులై నుంచే ఆయన 'పికాక్స్' గురించి పదేపదే ప్రస్తావిస్తున్నారు. "మేము పీకాక్స్ మౌంటెన్‌ను కూల్చివేయబోతున్నాం. ఇరానియన్లు సిద్ధంగా ఉండాలి" అని జులైలో వ్యాఖ్యానించారు. వేలాది సెంట్రిఫ్యూజ్‌లను, శుద్ధి చేసిన యురేనియంను ఇరాన్ ఇక్కడికి తరలించి ఉండొచ్చని ఇజ్రాయెల్ నిఘా వర్గాలు నివేదించినప్పటికీ, అలాంటి సమాచారం తమ వద్ద అధికారికంగా లేదని ట్రంప్ చెప్పడం గమనార్హం.

ప్రస్తుతానికి పికాక్స్‌పై అమెరికా దాడి చేయనప్పటికీ, ఉద్రిక్తతలు మాత్రం కొనసాగుతున్నాయి. ఇరాన్‌తో జరుగుతున్నది 'యుద్ధం' కాదని, 'సైనిక ఘర్షణ' అని ట్రంప్ అభివర్ణిస్తున్నారు. మరోవైపు, పీకాక్స్‌లో ఎలాంటి అణు కార్యకలాపాలు జరగడం లేదని ఇరాన్ స్పష్టం చేస్తోంది.