డ్రైవింగ్ లైసెన్స్‌లో కొత్త విధానం.. ఇక పాయింట్ల సిస్టమ్!

దేశవ్యాప్తంగా డ్రైవింగ్ లైసెన్స్‌ల జారీ, నిర్వహణలో ఒక కీలక మార్పునకు కేంద్ర ప్రభుత్వం శ్రీకారం చుట్టబోతోంది. ట్రాఫిక్ నిబంధనలు ఉల్లంఘించే వారికి పెనాల్టీలు, బాధ్యతాయుతంగా నడిపే వారికి రివార్డులు ఇచ్చేలా 'పాయింట్ల ఆధారిత వ్యవస్థ'ను తీసుకురానున్నట్లు కేంద్ర రోడ్డు రవాణా, రహదారుల శాఖ మంత్రి నితిన్ గడ్కరీ ప్రకటించారు. రోడ్డు భద్రతను మెరుగుపరచడం, అలవాటుగా నేరాలకు పాల్పడే వారిని కట్టడి చేయడమే ఈ ప్రతిపాదన ముఖ్య ఉద్దేశం.

న్యూఢిల్లీలో సెప్టెంబర్ 3న జరిగిన 66వ సియామ్ (సొసైటీ ఆఫ్ ఇండియన్ ఆటోమొబైల్ మాన్యుఫ్యాక్చరర్స్) వార్షిక సదస్సులో గడ్కరీ ఈ ప్రతిపాదనను వెల్లడించారు. ఈ కొత్త విధానం ప్రకారం, ప్రతి డ్రైవింగ్ లైసెన్స్‌కు కొన్ని పాయింట్లు కేటాయిస్తారు. వాహనదారులు ఓవర్ స్పీడింగ్, రెడ్ లైట్ జంపింగ్, రాంగ్ రూట్‌లో వెళ్లడం వంటి ట్రాఫిక్ ఉల్లంఘనలకు పాల్పడినప్పుడు వారి లైసెన్స్ నుంచి పాయింట్లు తగ్గుతాయి.

ఒక నిర్దిష్ట పరిమితికి మించి పాయింట్లు కోల్పోతే, ఆ డ్రైవింగ్ లైసెన్స్‌ను తాత్కాలికంగా సస్పెండ్ చేస్తారు. పదేపదే తీవ్రమైన నేరాలకు పాల్పడితే లైసెన్స్‌ను శాశ్వతంగా రద్దు చేసే అధికారం కూడా ఉంటుంది. మరోవైపు, ఎలాంటి ఉల్లంఘనలకు పాల్పడకుండా, బాధ్యతగా వాహనం నడిపే వారికి 'గుడ్ పాయింట్స్' జమ అవుతాయి. ఈ పాయింట్ల ఆధారంగా ఇన్సూరెన్స్ కంపెనీల నుంచి ప్రీమియంలో డిస్కౌంట్లు, ఇతర ప్రయోజనాలు పొందవచ్చు.

ఈ వ్యవస్థ గురించి గడ్కరీ వివరిస్తూ.. "ప్రతి నేరానికి డ్రైవింగ్ లైసెన్స్‌పై పాయింట్లు తగ్గుతాయి. ఒక నిర్దిష్ట పరిమితి దాటితే లైసెన్స్ సస్పెండ్ లేదా రద్దు అవుతుంది. అయితే గుడ్ పాయింట్స్ ఉన్నవారికి ఇన్సూరెన్స్ కంపెనీల నుంచి ఇన్సెంటివ్స్, ఇతర ప్రయోజనాలు లభిస్తాయి" అని స్పష్టం చేశారు.

దేశంలో ఏటా సుమారు 5 లక్షల రోడ్డు ప్రమాదాలు జరగడం, వాటిలో 1.8 లక్షల మంది ప్రాణాలు కోల్పోతుండటం ఆందోళన కలిగిస్తోందని గడ్కరీ అన్నారు. ఈ మరణాల్లో 72 శాతం మంది 18-45 ఏళ్ల మధ్య వయస్కులే ఉండటంతో, రోడ్డు భద్రతను పెంచేందుకు ఈ చర్యలు అవసరమని ఆయన అభిప్రాయపడ్డారు.

ప్రస్తుతం ఈ పాయింట్ల విధానం ప్రతిపాదన దశలోనే ఉంది. ఏ నేరానికి ఎన్ని పాయింట్లు తగ్గించాలి, సస్పెన్షన్ పరిమితి వంటి పూర్తి నిబంధనలు ఇంకా ఖరారు కాలేదు. దీని కోసం మోటార్ వాహనాల చట్టంలో సవరణలు చేయాల్సి ఉంటుంది. దీంతో పాటు, డ్రైవర్లకు నాణ్యమైన శిక్షణ ఇచ్చేందుకు 1,600 డ్రైవింగ్ కేంద్రాలను ఏర్పాటు చేయాలని, 2027 నుంచి కార్ల భద్రత కోసం భారత్ ఎన్‌సీఏపీ 2.0 సేఫ్టీ రేటింగ్స్ అమలు చేయనున్నట్లు కూడా గడ్కరీ తెలిపారు.