ప్రైవేట్ జెట్, విలాసవంతమైన ఇళ్లు.. నయనతార ఆస్తుల విలువ తెలిస్తే షాకే!

దక్షిణాది సినిమా పరిశ్రమలో 'లేడీ సూపర్‌స్టార్'గా తనకంటూ ఒక ప్రత్యేక స్థానాన్ని సంపాదించుకున్న నయనతార, నటిగా అద్భుతమైన ప్రయాణాన్ని కొనసాగిస్తున్నారు. కేవలం నటనతోనే కాకుండా తన వ్యాపార దక్షతతోనూ భారీ ఆర్థిక సామ్రాజ్యాన్ని నిర్మించుకున్నారు. 'టైమ్స్ ఆఫ్ ఇండియా'ను ఉటంకిస్తూ ఎన్డీటీవీ కథనం ప్రకారం నేడు ఆమె నికర ఆస్తుల విలువ రూ. 200 కోట్లకు పైమాటే. అయితే, ఒకప్పుడు మోడల్‌గా ఆమె అందుకున్న తొలి సంపాదన కేవలం కొన్ని వేల రూపాయలే కావడం గమనార్హం.

తొలి జీతం నుంచి స్టార్‌డమ్‌ వరకు
కేవలం 18 ఏళ్ల వయసులో 2003లో 'మనస్సినక్కరే' అనే మలయాళ చిత్రంతో నయనతార సినీ రంగ ప్రవేశం చేశారు. అంతకుముందు ఆమె ఒక ఫ్యాషన్ ప్రోగ్రామ్ కోసం 'వనిత' మ్యాగజైన్ కవర్‌పై ఫోటోషూట్ చేశారు. ఆ అసైన్‌మెంట్‌కు గానూ ఆమెకు రూ. 2,000 నుంచి రూ. 3,000 వరకు పారితోషికం లభించిందని ఇటీవలే ఓ ఇంటర్వ్యూలో గుర్తుచేసుకున్నారు.

తమిళంలో రజినీకాంత్‌తో 'చంద్రముఖి', సూర్యతో 'గజినీ' వంటి చిత్రాలతో స్టార్ హీరోయిన్‌గా మారారు. అయితే, 2007లో వచ్చిన 'బిల్లా' చిత్రంలో ఆమె బోల్డ్, స్టైలిష్ అవతార్‌లో కనిపించి అందరినీ ఆశ్చర్యపరిచారు. వ్యక్తిగత కారణాలతో రెండేళ్ల విరామం తర్వాత 2013లో 'రాజా రాణి'తో ఘనంగా పునరాగమనం చేశారు. ఆ తర్వాత వచ్చిన 'మాయ' (2015), 'ఆరం' (2017), 'కోలమావు కోకిల' (2018) వంటి చిత్రాలతో ఆమె సోలో హీరోయిన్‌గా బాక్సాఫీస్‌ను శాసించారు. హీరోలతో సంబంధం లేకుండా సినిమాను ఒంటిచేత్తో నడిపించగల సత్తా ఆమెకు ఉందని నిరూపించుకుని 'లేడీ సూపర్‌స్టార్' బిరుదును సార్థకం చేసుకున్నారు.

భారీగా పెరిగిన ఆదాయం, వ్యాపారాలు
కెరీర్ ఉన్నతస్థాయికి చేరాక, నయనతార పారితోషికం కూడా భారీగా పెరిగింది. ఒక్కో సినిమాకు రూ. 5 నుంచి 10 కోట్లు అందుకుంటున్న ఆమె, షారుఖ్ ఖాన్‌తో కలిసి నటించిన బాలీవుడ్ అరంగేట్ర చిత్రం 'జవాన్' కోసం రూ. 10 కోట్లు తీసుకున్నట్లు సమాచారం. ఇక తాజాగా 'టాక్సిక్' సినిమా కోసం రూ. 18 కోట్లు డిమాండ్ చేసినట్లు తెలుస్తోంది.

నటన మాత్రమే కాదు, వ్యాపార రంగంలోనూ నయన్ తనదైన ముద్ర వేస్తున్నారు. భర్త, దర్శకుడు విఘ్నేష్ శివన్‌తో కలిసి 'రౌడీ పిక్చర్స్' అనే నిర్మాణ సంస్థను నడుపుతున్నారు. దీని విలువ సుమారు రూ. 50 కోట్లు ఉంటుందని అంచనా. అలాగే, 2023లో '9స్కిన్' పేరుతో ఒక స్కిన్‌కేర్ బ్రాండ్‌ను, అంతకుముందు 2021లో ఒక లిప్ బామ్ కంపెనీని కూడా ప్రారంభించారు. ప్రకటనల ద్వారా కూడా భారీగా ఆర్జిస్తున్నారు. ఒక్కో యాడ్‌కు రూ. 4 కోట్ల నుంచి 5 కోట్లు తీసుకుంటున్న ఆమె, గతంలో టాటా స్కై 50 సెకన్ల వాణిజ్య ప్రకటన కోసం రూ. 5 కోట్లు ఛార్జ్ చేశారు.

విలాసవంతమైన ఆస్తులు
నయనతార ఆస్తుల జాబితా కూడా చాలా పెద్దదే. చెన్నైలో రజనీకాంత్ ఇంటికి సమీపంలో ఒక 4-బీహెచ్‌కే అపార్ట్‌మెంట్, హైదరాబాద్ బంజారాహిల్స్‌లో రూ. 30 కోట్ల విలువైన రెండు ఫ్లాట్లు, ముంబైలో ఓ విలాసవంతమైన ఇల్లు ఆమెకు ఉన్నాయి. వీటికి తోడు కేరళలో పూర్వీకుల ఇల్లు కూడా ఉంది.

జాతీయ మీడియా కథనం ప్రకారం.. ఆమెకు రూ. 50 కోట్ల విలువైన ప్రైవేట్ జెట్ కూడా ఉంది. ఇక, కార్ల విషయానికొస్తే.. జీక్యూ నివేదిక ప్రకారం ఆమె వద్ద బీఎండబ్ల్యూ 5 సిరీస్ (రూ. 74.50 లక్షలు), మెర్సిడెస్ బెంజ్ జీఎల్‌ఎస్ 350డి (రూ. 88 లక్షలు), బీఎండబ్ల్యూ 7 సిరీస్ (రూ. 1.76 కోట్లు) వంటి ఖరీదైన కార్లు ఉన్నాయి. ఇలా తన కష్టం, ప్రతిభ, తెలివైన పెట్టుబడులతో నయనతార నేటి తరానికి స్ఫూర్తిగా నిలుస్తున్నారు.