మలేషియాకు ప్రతివారం పాత బట్టలు పంపిస్తున్న సింగపూర్.. కారణం ఇదే!

సింగపూర్‌లో నానాటికీ పేరుకుపోతున్న వస్త్ర వ్యర్థాల సమస్య పరిష్కారానికి ఆ దేశం సరికొత్త వ్యూహాన్ని అనుసరిస్తోంది. రీసైక్లింగ్ ఒప్పందంలో భాగంగా ప్రతి వారం సుమారు 70 టన్నుల పాత వస్త్రాలను మలేషియాకు తరలిస్తోంది. గత రెండేళ్లతో పోలిస్తే ఈ వ్యర్థాల పరిమాణం రెట్టింపు కావడం గమనార్హం.

సింగపూర్ అంతటా 'క్లూప్' అనే సామాజిక సంస్థ రీసైక్లింగ్ బిన్‌ల ద్వారా ప్రజల నుంచి పాత వస్త్రాలను సేకరిస్తోంది. అనంతరం వాటిని మలేషియాలోని పోర్ట్ క్లాంగ్‌లో ఉన్న 'లైఫ్ లైన్ క్లోతింగ్' కేంద్రానికి తరలిస్తున్నారు. అక్కడ నిపుణులు ఆ వస్త్రాలను వివిధ రకాలుగా వర్గీకరిస్తారు. వాటిలో సుమారు సగం దుస్తులు పునర్వినియోగానికి అనువుగా ఉండటంతో వాటిని బేల్స్‌గా ప్యాక్ చేసి కెన్యా, ఉగాండా, పపువా న్యూ గినియా వంటి దేశాల్లోని సెకండ్ హ్యాండ్ మార్కెట్లకు ఎగుమతి చేస్తున్నారు.

మిగిలిన వాటిలో కొన్నింటిని పరిశ్రమలలో యంత్రాలు శుభ్రతకు ఉపయోగించే వైపింగ్ క్లాత్స్‌గా మారుస్తున్నారు. ఇక ఏమాత్రం పునర్వినియోగానికి పనికిరాని వస్త్రాలను ఇన్సినరేషన్ ప్రక్రియ ద్వారా కాల్చివేసి, తద్వారా విద్యుత్తును ఉత్పత్తి చేస్తున్నారు.

సింగపూర్‌లో పెరుగుతున్న వస్త్ర వ్యర్థాలు సాధారణ చెత్తలో కలవకుండా నివారించేందుకే ఈ సీమాంతర ఒప్పందం కుదిరింది. దుస్తులలో ఉండే మిశ్రమ ఫైబర్లు, బటన్లు, జిప్‌ల వంటి వాటి కారణంగా రీసైక్లింగ్ ప్రక్రియ క్లిష్టతరంగా మారుతోందని, అందుకే ఇలా శాస్త్రీయంగా వేరుచేయడం అనివార్యమని అధికారులు వెల్లడించారు. ఈ వ్యవస్థ ద్వారా పాత వస్తువులకు తిరిగి విలువ లభిస్తున్నప్పటికీ, అసలు వస్త్రాల వినియోగాన్ని తగ్గించుకోవడమే ఈ సమస్యకు దీర్ఘకాలిక పరిష్కారమని నిపుణులు అభిప్రాయపడుతున్నారు.