బెంగళూరు ఆటో డ్రైవర్ గొప్ప మనసు.. నెటిజన్ల ప్రశంసల వెల్లువ

బెంగళూరులో ఓ ఆటో డ్రైవర్ చాటుకున్న మానవత్వం ప్రస్తుతం సామాజిక మాధ్యమాల్లో నెటిజన్ల మనసు గెలుచుకుంటోంది. రహదారి మధ్యలో ఓ మహిళకు చెందిన స్కూటీ నిలిచిపోవడంతో, ఇబ్బంది పడుతున్న ఆమెకు ఆయన చేసిన సాయంపై ప్రశంసలు వెల్లువెత్తుతున్నాయి. ఈ ఘటనను ఆటోలోని ఓ ప్రయాణికురాలు వీడియో తీసి నెట్టింట పంచుకోవడంతో అది కాస్తా వైరల్‌గా మారింది.

చేత్నా సరాఫ్ అనే మహిళ ఉబెర్ ఆటోలో ప్రయాణిస్తుండగా ఈ దృశ్యం ఆమె దృష్టికి వచ్చింది. తొలుత ఏం జరుగుతుందో అర్థం కాకపోయినా, కాసేపటికే అసలు విషయం ఆమెకు అవగతమైంది. స్కూటీ మొరాయించడంతో సదరు మహిళ నడిరోడ్డుపై ఇబ్బంది పడుతుండటం గమనించిన డ్రైవర్, తన ఆటోను నడుపుతూనే కాలితో ఆ స్కూటీని ముందుకు నెట్టడం ప్రారంభించాడు.

దాదాపు 10 నుంచి 15 నిమిషాల పాటు ఆయన ఆ మహిళకు నిరంతరాయంగా సహాయం చేశాడు. ఒకవైపు ఆటో నడుపుతూనే, మరోవైపు కాలితో స్కూటీని తోస్తూ, ఆమె సురక్షిత ప్రాంతానికి చేరుకునే వరకు తోడుగా నిలిచాడు.

డ్రైవర్ ఉదారతకు చలించిపోయిన చేత్నా సరాఫ్, ఈ దృశ్యాలను వీడియో తీసి ఇన్‌స్టాగ్రామ్‌లో పోస్ట్ చేశారు. "ఈ రోజుల్లో కూడా ఇలాంటి మంచితనం ఇంకా సజీవంగా ఉండటం నా ప్రయాణంలో అత్యంత మధురమైన అనుభూతిని మిగిల్చింది" అని ఆమె పేర్కొన్నారు. ఉబెర్ ఇండియాను ట్యాగ్ చేస్తూ, ఆ డ్రైవర్‌కు తగిన గుర్తింపు దక్కాలని ఆమె కోరారు. ఈ వీడియోకు సోషల్ మీడియాలో అనూహ్య స్పందన లభిస్తోంది. సదరు డ్రైవర్ నిజమైన బాధ్యతాయుత పౌరుడని, మానవత్వంపై నమ్మకాన్ని మరింత పెంచారని నెటిజన్లు ప్రశంసల జల్లు కురిపిస్తున్నారు.