ఈద్ మిలాద్-ఉన్-నబీ: రేపు పలు రాష్ట్రాల్లో బ్యాంకులకు సెలవు.. ఏ సేవలు అందుబాటులో ఉంటాయంటే..!

ప్రవక్త మహమ్మద్ జన్మదినాన్ని పురస్కరించుకుని ముస్లింలు జరుపుకునే ఈద్ మిలాద్-ఉన్-నబీ పండుగ మంగళవారం (ఆగస్టు 25) సాయంత్రం నుంచి ప్రారంభం కానుంది. ఈ వేడుకలు బుధవారం (ఆగస్టు 26) సాయంత్రం వరకు కొనసాగుతాయి. ఈ సందర్భంగా బుధవారం తెలంగాణ సహా దేశంలోని పలు రాష్ట్రాల్లో బ్యాంకులకు సెలవు ప్రకటించారు.

ఇస్లామిక్ క్యాలెండర్‌లోని మూడో నెల అయిన 'రబీ-అల్-అవ్వల్' 12వ రోజున ఈ పండుగను జరుపుకుంటారు. ప్రవక్త మహమ్మద్ బోధించిన ప్రేమ, కరుణ, న్యాయం, సమానత్వం వంటి విలువలను ఈ రోజున ముస్లింలు స్మరించుకుంటారు. క్రీ.శ. 570లో మక్కాలో జన్మించిన ప్రవక్త, ఇదే రోజున స్వర్గస్తులయ్యారని కూడా నమ్ముతారు.

రిజర్వ్ బ్యాంక్ ఆఫ్ ఇండియా (ఆర్బీఐ) విడుదల చేసిన అధికారిక సెలవుల క్యాలెండర్ ప్రకారం, బుధవారం తెలంగాణ, మహారాష్ట్ర, కర్ణాటక, తమిళనాడు, మధ్యప్రదేశ్, ఉత్తరాఖండ్, మణిపూర్, జమ్మూకశ్మీర్, ఉత్తరప్రదేశ్, కేరళ, ఢిల్లీ, బీహార్, ఛత్తీస్‌గఢ్, జార్ఖండ్ రాష్ట్రాల్లో బ్యాంకులకు సెలవు ఉంటుంది.

అయితే, బ్యాంకులకు సెలవు ఉన్నప్పటికీ ఏటీఎం, ఆన్‌లైన్ బ్యాంకింగ్, మొబైల్ బ్యాంకింగ్, యూపీఐ సేవలు యథావిధిగా పనిచేస్తాయి. వినియోగదారులు డిజిటల్ లావాదేవీలు జరుపుకోవచ్చు. కౌంటర్ వద్ద నగదు డిపాజిట్, విత్‌డ్రా, చెక్కుల క్లియరెన్స్, పాస్‌బుక్ అప్‌డేట్ వంటి సేవలకు అంతరాయం కలుగుతుంది. ఈద్ మిలాద్-ఉన్-నబీ సందర్భంగా మసీదులను, వీధులను విద్యుత్ దీపాలతో అలంకరించి, ప్రవక్తను స్మరించుకుంటూ ఊరేగింపులు నిర్వహిస్తారు.