మాజీ ఎమ్మెల్యే పీఏ హత్య కేసులో ముగ్గురి అరెస్ట్

పశ్చిమ బెంగాల్‌లో తృణమూల్ కాంగ్రెస్ మాజీ ఎమ్మెల్యే సునీల్ సింగ్ వ్యక్తిగత సహాయకుడు శేఖర్ చౌదరి అలియాస్ బంటీ (30) హత్య కేసులో ముగ్గురు నిందితులను పోలీసులు అరెస్టు చేశారు. ఉత్తర 24 పరగణాల జిల్లా నోపారా అసెంబ్లీ నియోజకవర్గ పరిధిలోని గరులియాలో ఈ దారుణం చోటుచేసుకుంది.

ఈ నెల 19న బంటీపై కొందరు దుండగులు దాడికి తెగబడ్డారు. ఇటుకతో తలపై బలంగా బాదడంతో తీవ్ర గాయాలైన బాధితుడిని తొలుత బారక్‌పూర్‌లోని ఆసుపత్రికి తరలించారు. అనంతరం పరిస్థితి విషమించడంతో కోల్‌కతాలోని ఓ ప్రైవేటు ఆసుపత్రికి తరలించగా, అక్కడ చికిత్స పొందుతూ ఆదివారం రాత్రి (ఆగస్టు 24) మృతి చెందాడు.

బంటీ ఇంటి సమీపంలోని ఓ క్లబ్ వద్ద కొందరు యువకులు మద్యం తాగుతుండగా, వారిని వారించినట్లు స్థానిక వర్గాలు వెల్లడించాయి. ఈ క్రమంలో ఇరువర్గాల మధ్య వాగ్వాదం చోటుచేసుకుని, అది కాస్తా దాడికి దారితీసింది. ఈ ఘటనకు సంబంధించిన సీసీటీవీ ఫుటేజీ ప్రస్తుతం వెలుగులోకి వచ్చింది.

ఈ కేసులో నోపారా పోలీసులు బికీ చౌదరి, అమన్ చౌదరి, పింటూ చౌదరిలను సోమవారం అరెస్ట్ చేశారు. నిందితులకు గతంలో నిషేధిత మాదకద్రవ్యాల విక్రయాలతో సంబంధం ఉన్నట్లు సమాచారం. ఈ ప్రాంతంలో సుదీర్ఘకాలంగా హెరాయిన్ వంటి మత్తుపదార్థాల అమ్మకాలు సాగుతున్నా పోలీసులు పట్టించుకోవడం లేదని స్థానికులతో పాటు మాజీ ఎమ్మెల్యే సునీల్ సింగ్ ఆరోపించారు.

రాష్ట్ర మంత్రి అర్జున్ సింగ్ మృతుడి కుటుంబాన్ని పరామర్శించి, ప్రభుత్వం అండగా ఉంటుందని భరోసా ఇచ్చారు. బంటీ మృతితో గరులియాలో ఉద్రిక్త పరిస్థితులు నెలకొన్నాయి. ఈ దాడిలో ఇంకా ఎవరి ప్రమేయమైనా ఉందా అనే కోణంలో పోలీసులు దర్యాప్తును ముమ్మరం చేశారు.