బెంగాల్‌లో ఉండాలంటే వందేమాతరం పాడాల్సిందే: సువేందు అధికారి

పశ్చిమ బెంగాల్‌లో నివసించే ప్రతి ఒక్కరూ తప్పనిసరిగా 'వందేమాతరం' పాడాల్సిందేనని ఆ రాష్ట్ర ముఖ్యమంత్రి సువేందు అధికారి సంచలన వ్యాఖ్యలు చేశారు. జాతీయవాదం, దేశభక్తి విషయంలో తమ ప్రభుత్వం రాజీ పడబోదని ఆయన స్పష్టం చేశారు.

శనివారం తన భవానీపూర్ నియోజకవర్గంలో అన్నపూర్ణ యోజన లబ్ధిదారులతో జరిగిన సమావేశంలో సువేందు అధికారి ప్రసంగించారు. "పశ్చిమ బెంగాల్‌లో ఉండాలంటే, వందేమాతరం పాడాల్సిందే. ఈ ముఖ్యమంత్రి జాతీయవాదం, దేశభక్తి విషయంలో రాజీపడరు" అని ఆయన తేల్చిచెప్పారు.

ఇటీవల జాదవ్‌పూర్ యూనివర్సిటీలో విద్యార్థి సంఘాల మధ్య జరిగిన ఘర్షణల నేపథ్యంలో సీఎం ఈ వ్యాఖ్యలు చేయడం ప్రాధాన్యం సంతరించుకుంది. యూనివర్సిటీలో కొన్ని ‘దేశ వ్యతిరేక’, ‘జిహాదీ’ శక్తులు ఉన్నాయని ఆయన ఆరోపించారు. వందేమాతరం పాడటాన్ని, జాతీయ పతాకావిష్కరణను, సీసీటీవీ కెమెరాల ఏర్పాటును వారు అడ్డుకుంటున్నారని విమర్శించారు. క్యాంపస్‌లో గణతంత్ర, స్వాతంత్య్ర దినోత్సవ వేడుకలు జరగకుండా కూడా ఈ శక్తులు అడ్డుపడుతున్నాయని మండిపడ్డారు.

"కొన్ని మీడియా సంస్థలు దేశ వ్యతిరేకులకు మద్దతుగా ఎంత రాసినా, జాదవ్‌పూర్ లోపల, బయట మేము జాతీయవాదాన్ని స్థాపిస్తాం" అని సువేందు పేర్కొన్నారు. శ్యామా ప్రసాద్ ముఖర్జీ ఆశయాలను నెరవేర్చడానికే తమ ప్రభుత్వం ఏర్పడిందని, జాదవ్‌పూర్ యూనివర్సిటీ జాతీయవాదాన్ని, భారతీయ, సనాతన సంస్కృతిని ప్రతిబింబించాలని ఆయన అన్నారు.

కాగా, 2026 మే నెలలోనే రాష్ట్రంలోని అన్ని ప్రభుత్వ, ఎయిడెడ్ పాఠశాలల్లో ఉదయం అసెంబ్లీ సమయంలో వందేమాతరం పాడటాన్ని సువేందు ప్రభుత్వం తప్పనిసరి చేసిన విషయం తెలిసిందే. అయితే, ప్రస్తుతం రాష్ట్రంలోని పౌరులందరికీ దీన్ని వర్తింపజేస్తూ ఎలాంటి అధికారిక ప్రభుత్వ ఉత్తర్వులు వెలువడలేదు. ఇది సీఎం చేసిన రాజకీయ ప్రకటనగానే భావించాల్సి ఉంటుంది.