ఆఫ్ఘ‌నిస్థాన్‌తో టీమిండియా సిరీస్ ఖరారు.. బంగ్లాదేశ్ పర్యటన రద్దయినట్టేనా?

శ్రీలంకతో టెస్ట్ సిరీస్ తర్వాత చిన్న విరామం తీసుకున్న భారత క్రికెట్ జట్టు మళ్లీ బిజీ కానుంది. సెప్టెంబర్‌లో ఆఫ్ఘ‌నిస్థాన్‌తో మూడు టీ20ల సిరీస్‌లో టీమిండియా తలపడనుంది. ఈ సిరీస్‌ను ఆఫ్ఘ‌నిస్థాన్ క్రికెట్ బోర్డు (ఏసీబీ) అధికారికంగా ఖరారు చేసింది. అయితే, ఈ షెడ్యూల్ కారణంగా సెప్టెంబర్‌లోనే జరగాల్సిన బంగ్లాదేశ్ పర్యటనపై అనుమానాలు నెలకొన్నాయి.

క్రిక్‌బజ్ కథనం ప్రకారం.. ఈ మూడు టీ20 మ్యాచ్‌లు సెప్టెంబర్ 13, 15, 17 తేదీల్లో ఢిల్లీలోని అరుణ్ జైట్లీ స్టేడియంలో జరగనున్నాయి. ఈ సిరీస్‌కు ఆఫ్ఘ‌నిస్థాన్ ఆతిథ్యం ఇస్తోంది. "భారత్, ఆఫ్ఘ‌నిస్థాన్ మధ్య 2026 సిరీస్ సెప్టెంబర్ 13 నుంచి 17 వరకు జరగనుందని ఏసీబీ నిర్ధారిస్తోంది" అని ఏసీబీ సీఈఓ నసీబ్ ఖాన్ తమ వాణిజ్య భాగస్వాములకు రాసిన లేఖలో పేర్కొన్నట్లు సమాచారం.

వాస్తవానికి షెడ్యూల్ ప్రకారం సెప్టెంబర్ 1 నుంచి 13 వరకు భారత్ బంగ్లాదేశ్‌లో పర్యటించాల్సి ఉంది. ఈ పర్యటనలో ఆరు వైట్-బాల్ మ్యాచ్‌లు ఉన్నాయి. ఇప్పుడు ఆఫ్ఘ‌న్ సిరీస్ తేదీలు ఖరారు కావడంతో బంగ్లా పర్యటన సందిగ్ధంలో పడింది. బీసీసీఐతో చర్చించిన తర్వాతే మ్యాచ్‌ల తేదీలు, వేదికలను ఖరారు చేసినట్లు ఏసీబీ తమ లేఖలో స్పష్టం చేసింది.

ఈ సిరీస్‌కు సంబంధించి అధికారికంగా బహిరంగ ప్రకటన ఇంకా చేయనప్పటికీ, తమ భాగస్వాముల కోసం తేదీలు, వేదికలను నిర్ధారిస్తున్నట్లు ఏసీబీ ఆ లేఖలో తెలిపింది. ఈ పరిణామంతో సెప్టెంబర్‌లోని బంగ్లాదేశ్ పర్యటన దాదాపుగా రద్దయ్యే అవకాశాలు కనిపిస్తున్నాయి.