మన స్వాతంత్ర్య దినోత్సవానికి అమెరికాలో గౌరవం: 'ఇండియా డే'గా మసాచుసెట్స్ గవర్నర్ ప్రకటన

అమెరికాలోని మసాచుసెట్స్ రాష్ట్ర ప్రభుత్వం ఆగస్టు 15వ తేదీని అధికారికంగా 'ఇండియా డే'గా ప్రకటించింది. భారత స్వాతంత్ర్య దినోత్సవాన్ని పురస్కరించుకుని, ఆ రాష్ట్ర ఆర్థిక, సాంస్కృతిక, సామాజిక రంగాల్లో భారతీయ అమెరికన్ సమాజం అందిస్తున్న విశేష సేవలను గౌరవిస్తూ ప్రభుత్వం ఈ నిర్ణయం తీసుకుంది.

భారత 79వ స్వాతంత్ర్య వార్షికోత్సవ సందర్భాన్ని పురస్కరించుకుని, మసాచుసెట్స్ గవర్నర్ మౌరా హీలీ ఆగస్టు 1న ఈ అధికారిక ఉత్తర్వులపై సంతకం చేశారు. లెఫ్టినెంట్ గవర్నర్ కింబర్లీ డ్రిస్కాల్, సెక్రటరీ ఆఫ్ కామన్వెల్త్ విలియం ఫ్రాన్సిస్ గాల్విన్ సైతం ఈ ప్రకటనను ఆమోదించారు. ఈ విశిష్ట సందర్భాన్ని మసాచుసెట్స్ రాష్ట్ర పౌరులందరూ గుర్తించి, వేడుకల్లో భాగస్వాములు కావాలని వారు పిలుపునిచ్చారు.

ప్రపంచవ్యాప్తంగా సుమారు 3.6 కోట్లకు పైగా ప్రవాస భారతీయులు ఉండగా, వారిలో దాదాపు 50 లక్షల మంది అమెరికాలోనే నివసిస్తున్నారని అధికారిక ప్రకటనలో పేర్కొన్నారు. ముఖ్యంగా మసాచుసెట్స్‌ రాష్ట్రంలో వైద్యం, సైన్స్, టెక్నాలజీ, విద్య, వ్యాపారం, ప్రజా సేవ వంటి రంగాల్లో భారతీయ అమెరికన్లు కీలక పాత్ర పోషిస్తున్నారని ప్రభుత్వం ప్రశంసించింది. వారి భాగస్వామ్యం ద్వారా రాష్ట్ర సాంస్కృతిక వైవిధ్యం, ఆర్థిక వ్యవస్థ మరింత బలోపేతమయ్యాయని కొనియాడింది.

ఇదే స్ఫూర్తితో, బోస్టన్ నగర మేయర్ మిచెల్ వు కూడా ఆగస్టు 15ను 'ఇండియా డే'గా ప్రకటిస్తూ ప్రత్యేక ఉత్తర్వులు జారీ చేశారు.