క్యాన్సర్ గడ్డలకు సరికొత్త చికిత్స.. ప్రపంచంలోనే తొలిసారి!

క్యాన్సర్ చికిత్సా రంగంలో ఒక చరిత్రాత్మక ఘట్టం ఆవిష్కృతమైంది. గడ్డల రూపంలో ఏర్పడే క్యాన్సర్లకు (సాలిడ్ ట్యూమర్స్) వ్యతిరేకంగా ప్రపంచంలోనే తొలిసారిగా ఆమోదం పొందిన 'కైమెరిక్ యాంటిజెన్ రిసెప్టర్' (CAR) T-సెల్ థెరపీ చికిత్సను మొదటి అంతర్జాతీయ రోగికి అందించడం ప్రారంభమైంది. ఇప్పటివరకు కేవలం రక్త క్యాన్సర్లకే పరిమితమైన ఈ అధునాతన సెల్యులార్ ఇమ్యునోథెరపీ, ఇప్పుడు ఘన కణితుల చికిత్సలోనూ సరికొత్త ఆశలు రేకెత్తిస్తోంది.

న్యూజిలాండ్‌కు చెందిన 59 ఏళ్ల జాష్, తీవ్రమైన గ్యాస్ట్రోడ్యూడెనల్ క్యాన్సర్‌తో బాధపడుతున్నారు. తన దేశంలో అందుబాటులో ఉన్న అన్ని చికిత్సా విధానాలు విఫలం కావడంతో ఆయన చివరి ఆశగా చైనాలోని షాంఘైలో ఉన్న జియాహుయ్ ఇంటర్నేషనల్ క్యాన్సర్ సెంటర్‌ను ఆశ్రయించారు. అక్కడ నిర్వహించిన బయోమార్కర్ పరీక్షలలో, అతని క్యాన్సర్ కణాలపై క్లాడిన్18.2 (CLDN18.2) పాజిటివ్‌గా, హెచ్ఈఆర్2 (HER2) నెగటివ్‌గా నిర్ధారణ అయింది. దీంతో చైనాలో మాత్రమే అందుబాటులో ఉన్న 'శాట్రిక్యాబ్టాజీన్ ఆటోల్యూసెల్ (శాట్రి-సెల్)' అనే ఈ సరికొత్త థెరపీకి ఆయన అర్హత సాధించారు. ఇటీవలే ఆయన ల్యూకాఫెరిసిస్ ప్రక్రియను విజయవంతంగా పూర్తి చేసుకున్నారు. ఈ ప్రక్రియలో అతని రక్తం నుంచి రోగనిరోధక కణాలను వేరు చేశారు. ప్రస్తుతం ఈ కణాలను ల్యాబ్‌లో క్యాన్సర్‌పై పోరాడేలా ఇంజనీరింగ్ చేస్తున్నారు. రాబోయే వారాల్లో ఈ శక్తివంతమైన కణాలను తిరిగి జాష్ శరీరంలోకి ప్రవేశపెడతారు.

ఏమిటీ 'CAR-T' థెరపీ?
'CAR-T' థెరపీ అనేది ఒక విప్లవాత్మక చికిత్సా విధానం. ఇందులో రోగి శరీరం నుంచే రోగనిరోధక కణాలను (T-కణాలు) సేకరిస్తారు. ప్రయోగశాలలో వాటికి క్యాన్సర్‌ను గుర్తించి, దానిపై దాడి చేసి నాశనం చేసేలా జన్యుపరంగా మార్పులు చేస్తారు. ఈ శక్తివంతమైన కణాలను తిరిగి రోగి శరీరంలోకి ఎక్కించడంతో, అవి క్యాన్సర్ కణాలను వెతికి మరీ అంతం చేస్తాయి. గత దశాబ్ద కాలంగా ఈ థెరపీ రక్త క్యాన్సర్ల చికిత్సలో అద్భుత ఫలితాలు ఇస్తోంది.

అయితే, గడ్డల రూపంలో ఉండే ఘన కణితుల విషయంలో ఈ థెరపీని అభివృద్ధి చేయడం సవాలుగా మారింది. కణితి చుట్టూ ఉండే సంక్లిష్ట వాతావరణం, యాంటిజెన్ వైవిధ్యం వంటి కారణాలతో ఈ థెరపీలు సమర్థంగా పనిచేయలేకపోయాయి. 'శాట్రి-సెల్' ఆమోదంతో ఆ అడ్డంకి తొలగిపోయింది. చైనా 'నేషనల్ మెడికల్ ప్రొడక్ట్స్ అడ్మినిస్ట్రేషన్' (ఎన్ఎంపీఏ), రెండుసార్లు ఇతర చికిత్సలు విఫలమైన క్లాడిన్18.2-పాజిటివ్, హెచ్ఈఆర్2-నెగటివ్ గ్యాస్ట్రిక్ క్యాన్సర్ రోగుల కోసం ఈ ఏడాది 2026 జూన్ లో 'శాట్రి-సెల్' థెరపీకి ఆమోదం తెలిపింది. కీలకమైన రెండవ దశ క్లినికల్ ట్రయల్స్‌లో, ఇతర చికిత్సలతో పోలిస్తే ఈ థెరపీ తీసుకున్న రోగులలో వ్యాధి తీవ్రత పెరగకుండా ఎక్కువ కాలం నియంత్రించగలిగినట్లు తేలింది.

నిపుణుల అభిప్రాయం ప్రకారం చివరి దశ క్యాన్సర్ రోగులకు ఇది ఒక కొత్త చికిత్సా మార్గాన్ని అందిస్తున్నప్పటికీ, దీని దీర్ఘకాలిక సమర్థత, విస్తృత లభ్యత, తొలి దశల్లోనే దీనిని ఉపయోగించే అవకాశాలపై మరిన్ని పరిశోధనలు జరగాల్సి ఉంది. ఏదేమైనా, ఈ పరిణామం చైనా సెల్యులార్ థెరపీ రంగంలో సాధిస్తున్న పురోగతికి, ప్రపంచవ్యాప్తంగా రోగులు సరికొత్త చికిత్సల కోసం సరిహద్దులు దాటుతున్నారనడానికి నిదర్శనంగా నిలుస్తోంది.