ఏపీ లిక్కర్ స్కామ్... వైసీపీ నేత కారుమూరికి సుప్రీంకోర్టులో ఎదురుదెబ్బ
- ముందస్తు బెయిల్ కోసం సుప్రీంకోర్టును ఆశ్రయించిన కారుమూరి
- బెయిల్ ఇవ్వడం కుదరదన్న సుప్రీంకోర్టు
- నిజాలు బయటకు రావాలంటే విచారణ అత్యంత కీలకమని వ్యాఖ్య
ఏపీ మద్యం కుంభకోణం కేసులో వైసీపీ సీనియర్ నేత, మాజీ మంత్రి కారుమూరి నాగేశ్వరరావుకు దేశ అత్యున్నత న్యాయస్థానంలో తీవ్ర విఘాతం కలిగింది. అరెస్టు కాకుండా రక్షణగా ముందస్తు బెయిల్ మంజూరు చేయాలంటూ ఆయన చేసుకున్న విన్నపాన్ని సుప్రీంకోర్టు స్పష్టంగా తిరస్కరించింది.
చీఫ్ జస్టిస్ నేతృత్వంలోని బెంచ్ ఈ పిటిషన్‌ను విచారిస్తూ... మద్యం అక్రమాల వ్యవహారంలో రూ. 350 కోట్లకు పైగా ప్రజాధనం దుర్వినియోగమైందనడానికి ప్రాథమిక ఆధారాలు ఉన్నాయని పేర్కొంది. ఈ తరహా భారీ స్థాయి అవినీతి ఆరోపణలు ఎదుర్కొంటున్న కేసులో రక్షణ కల్పించడం సాధ్యం కాదని తేల్చిచెప్పిన ధర్మాసనం... నిజానిజాలు బయటకు రావాలంటే కస్టోడియల్ విచారణ అత్యంత కీలకమని వ్యాఖ్యానించింది.
కారుమూరి తరఫు లాయర్లు బెయిల్ కోసం ప్రయత్నించినప్పటికీ, కేసు తీవ్రత దృష్ట్యా సుప్రీంకోర్టు ఆ విజ్ఞప్తిని తోసిపుచ్చింది. దర్యాప్తు ఏజెన్సీలకు పూర్తిగా సహకరించాల్సిందిగా ఆదేశించడంతో, ఇప్పుడు కారుమూరిని చట్టపరమైన చిక్కులు మరింత చుట్టుముట్టినట్లయింది.
