రవితేజ 'ఇరుముడి'... ఆగస్టు 21న గ్రాండ్ రిలీజ్

మాస్ మహారాజా రవితేజ తన తదుపరి చిత్రంతో ప్రేక్షకులను పలకరించేందుకు సిద్ధమయ్యారు. ఆయన కథానాయకుడిగా, సెన్సిబుల్ డైరెక్టర్ శివ నిర్వాణ దర్శకత్వంలో తెరకెక్కుతున్న 'ఇరుముడి' సినిమా విడుదల తేదీని చిత్ర బృందం అధికారికంగా ప్రకటించింది. ఈ చిత్రాన్ని ఆగస్ట్ 21న ప్రపంచవ్యాప్తంగా థియేటర్లలో విడుదల చేయనున్నట్లు ఓ కొత్త పోస్టర్‌తో వెల్లడించింది. ఇంకా 25 రోజుల్లో సినిమా రానుందంటూ చేసిన ఈ ప్రకటనతో అభిమానుల్లో ఉత్సాహం నెలకొంది.

మాస్, యాక్షన్ చిత్రాలతో తనకంటూ ప్రత్యేక గుర్తింపు తెచ్చుకున్న రవితేజ, 'నిన్ను కోరి', 'మజిలీ', 'ఖుషి' వంటి ఎమోషనల్ ఫ్యామిలీ డ్రామాలతో విజయం సాధించిన శివ నిర్వాణ కాంబినేషన్‌లో ఈ సినిమా వస్తుండటంతో దీనిపై భారీ అంచనాలు ఏర్పడ్డాయి. " అత్యంత హృద్యమైన తండ్రీకూతుళ్ల కథ" అంటూ మేకర్స్ ఈ సినిమా థీమ్‌ను పరిచయం చేశారు. రవితేజను ఇప్పటివరకు చూడని ఒక కొత్త ఎమోషనల్ పాత్రలో ఈ చిత్రం చూపించబోతోందని స్పష్టమవుతోంది. విడుదల చేసిన పోస్టర్‌లో రవితేజ, బేబీ నక్షత్ర తండ్రీకూతుళ్లుగా కనిపించడం ఆకట్టుకుంటోంది.

ఈ చిత్రాన్ని ప్రఖ్యాత నిర్మాణ సంస్థలు మైత్రీ మూవీ మేకర్స్, టీ-సిరీస్ ఫిలిమ్స్ సంయుక్తంగా నిర్మిస్తున్నాయి. నవీన్ యెర్నేని, వై. రవిశంకర్, భూషణ్ కుమార్, క్రిషన్ కుమార్ నిర్మాతలుగా వ్యవహరిస్తున్నారు. ఈ సినిమాలో రవితేజ సరసన ప్రియా భవానీ శంకర్ హీరోయిన్‌గా నటిస్తుండగా, ప్రముఖ నటుడు సాయికుమార్ కీలక పాత్రలో కనిపించనున్నారు. జీవీ ప్రకాశ్ కుమార్ సంగీతం ఈ సినిమాకు ప్రధాన ఆకర్షణగా నిలవనుంది. విష్ణు శర్మ సినిమాటోగ్రఫీ, ప్రవీణ్ పూడి ఎడిటింగ్ బాధ్యతలు నిర్వర్తిస్తున్నారు. ఒక మాస్ హీరో, ఎమోషనల్ కథతో వస్తుండటంతో 'ఇరుముడి' చిత్రంపై సినీ వర్గాల్లో, ప్రేక్షకుల్లో ఆసక్తి రెట్టింపయింది.