బిహార్‌లో విద్యార్థులపై ఏకే-47తో కాల్పులు.. పోలీసు అధికారి సస్పెన్షన్‌

నీట్‌ పరీక్ష అక్రమాలపై బిహార్‌లో జరిగిన విద్యార్థుల నిరసనల సందర్భంగా ఏకే-47తో కాల్పులు జరిపిన పోలీసు అధికారిని సస్పెండ్‌ చేశారు. ఈ ఘటనపై రాజ్యసభ ఎంపీ మనోజ్‌ కుమార్‌ ఝా సుప్రీంకోర్టులో ప్రజాహిత వ్యాజ్యం (పిల్‌) దాఖలు చేశారు.

జులై 25న నిర్వహించిన ‘బిహార్‌ బంద్‌’ సందర్భంగా రాష్ట్రవ్యాప్తంగా విద్యార్థి సంఘాలు ఆందోళనలు చేపట్టాయి. పలు చోట్ల పోలీసులు, నిరసనకారులకు మధ్య ఘర్షణలు చోటుచేసుకున్నాయి. లాఠీచార్జ్‌, టియర్‌ గ్యాస్‌, వాటర్‌ క్యానన్లను పోలీసులు వినియోగించారు. సివాన్‌లో జరిగిన కాల్పుల్లో ముగ్గురు గాయపడగా.. వారిలో 15 ఏళ్ల మహ్మద్‌ ఆరిఫ్‌ మెడలో బుల్లెట్‌ తగిలింది. శస్త్రచికిత్స ద్వారా బుల్లెట్‌ను తొలగించారు. ప్రస్తుతం అతడి ఆరోగ్యం నిలకడగా ఉందని వైద్యులు తెలిపారు.

ఈ ఘటనకు సంబంధించిన వీడియో సోషల్‌ మీడియాలో వైరల్‌గా మారడంతో ప్రతిపక్ష నేత తేజస్వీ యాదవ్‌ బాధ్యులపై కఠిన చర్యలు తీసుకోవాలని డిమాండ్‌ చేశారు. లోక్‌సభలో ప్రతిపక్ష నేత రాహుల్‌ గాంధీ కూడా స్పందిస్తూ.. ఢిల్లీలో విద్యార్థులపై పెల్లెట్‌ గన్స్‌, బిహార్‌లో ఏకే-47 వినియోగించడం ప్రభుత్వ వైఖరికి నిదర్శనమని విమర్శించారు. మరోవైపు ఘటనపై శాఖాపరమైన విచారణ ప్రారంభించినట్లు పోలీసులు వెల్లడించారు. ఆయుధ వినియోగం నిబంధనలకు అనుగుణంగానే జరిగిందా లేదా అనే అంశాన్ని విచారణలో తేల్చనున్నట్లు తెలిపారు.