'ఆదర్శ కుటుంబం' నుంచి కీలక అప్‌డేట్.. వెంకటేశ్‌ పాత్ర పేరు ఇదే!

విక్టరీ వెంకటేశ్‌, దర్శకుడు త్రివిక్రమ్ శ్రీనివాస్ కాంబినేషన్‌లో ఎంతో ఆసక్తిగా ఎదురుచూస్తున్న కొత్త చిత్రం నుంచి కీలక అప్‌డేట్ వచ్చింది. 'ఆదర్శ కుటుంబం హౌస్ నెం: 47- ఏకే 47' అనే టైటిల్‌తో తెరకెక్కుతున్న ఈ చిత్రంలో వెంకీ పోషిస్తున్న పాత్ర పేరును మేకర్స్ తాజాగా వెల్లడించారు. ఈ సినిమాలో ఆయ‌న‌ 'చిట్టి బాబు' అనే పాత్రలో ప్రేక్షకులను అలరించనున్నారు.

ఈ విషయాన్ని నిర్మాణ సంస్థ హారిక అండ్ హాసిని క్రియేషన్స్ సోషల్ మీడియా 'ఎక్స్' వేదికగా ప్రకటించింది. రేప‌టి నుంచి సినిమాలోని ఒక్కో పాత్రను పరిచయం చేయబోతున్నట్లు తెలిపింది. ఇందులో భాగంగా వెంకటేశ్‌ను చిట్టి బాబుగా, హీరోయిన్ శ్రీనిధి శెట్టిని స్వర్ణగా, ఇతర నటులు యువీన పార్థవిని సంపూర్ణగా, రాజా ప్రజ్వల్‌ను సర్వగా పరిచయం చేయనున్నట్లు పేర్కొంది.

ఇటీవలే నటుడు నారా రోహిత్ పుట్టినరోజు సందర్భంగా, ఆయన ఈ సినిమాలో నటిస్తున్నట్లు చిత్రబృందం అధికారికంగా ప్రకటించింది. దీనికి సంబంధించి ఓ ప్రత్యేక పోస్టర్‌ను కూడా విడుదల చేయగా, అందులో ఆయన పోలీస్ అధికారి పాత్రలో కనిపించనున్నట్లు తెలుస్తోంది.

గతంలో 'వెంకీ77'గా ప్రచారంలో ఉన్న ఈ చిత్రంపై మొదటి నుంచి భారీ అంచనాలు ఉన్నాయి. వెంకటేశ్‌ గత చిత్రం 'సంక్రాంతికి వస్తున్నాం' ఘన విజయం సాధించడం, దానికితోడు త్రివిక్రమ్ దర్శకత్వంలో ఆయన మొదటిసారి పూర్తిస్థాయి హీరోగా నటిస్తుండటంతో ఈ సినిమాపై ఆసక్తి రెట్టింపయింది. గతంలో వెంకటేశ్‌ కెరీర్‌లోని సూపర్ హిట్ చిత్రం 'నువ్వు నాకు నచ్చావ్'కు త్రివిక్రమ్ రచయితగా పనిచేసిన సంగతి తెలిసిందే. ఈ క్రేజీ కాంబినేషన్‌లో వస్తున్న 'ఆదర్శ కుటుంబం హౌస్ నెం: 47- ఏకే 47' చిత్రాన్ని అక్టోబర్ 2న విడుదల చేసేందుకు సన్నాహాలు చేస్తున్నారు.