ఇంటికి చేరిన నేషనల్ షూటర్ దమయంతి సేన్.. వీడని రెండు రోజుల మిస్టరీ

పశ్చిమ బెంగాల్‌లో తీవ్ర ఉత్కంఠ రేపిన నేషనల్ లెవల్ షూటర్ దమయంతి సేన్ అదృశ్యం కేసు సుఖాంతమైంది. గురువారం మధ్యాహ్నం నుంచి కనిపించకుండా పోయిన ఆమె, ఇవాళ‌ ఉదయం సురక్షితంగా ఇంటికి చేరారు. దీంతో ఆమె కుటుంబ సభ్యులు, స్నేహితులు, క్రీడా వర్గాలు ఊపిరి పీల్చుకున్నారు. అయితే, ఈ రెండు రోజులు ఆమె ఎక్కడికి వెళ్లింది, ఏం జరిగిందనే మిస్టరీ మాత్రం ఇంకా కొనసాగుతోంది.

వివరాల్లోకి వెళితే..  ఇవాళ‌ ఉదయం కోల్‌కతాకు సమీపంలోని హౌరా జిల్లా రామ్‌కృష్ణాపుర్ ఫెర్రీ జెట్టీ వద్ద 15 ఏళ్ల దమయంతి ఒంటరిగా కనిపించింది. మార్నింగ్ వాక్‌కు వచ్చిన కొందరు ఆమెను గుర్తించి, వెంటనే కుటుంబ సభ్యులకు సమాచారం అందించారు. హుటాహుటిన అక్కడికి చేరుకున్న ఆమె తండ్రి ధ్రుబజ్యోతి సేన్, కుమార్తెను ఇంటికి తీసుకెళ్లారు. ఆమె క్షేమంగా తిరిగి రావడంతో అందరూ సంతోషం వ్యక్తం చేసినప్పటికీ, ఈ వ్యవహారంపై మాట్లాడేందుకు కుటుంబ సభ్యులు నిరాకరిస్తున్నారు.

దమయంతి అదృశ్యంపై దర్యాప్తు చేసేందుకు నిన్న‌ ఏర్పాటు చేసిన నాలుగు సభ్యుల ప్రత్యేక దర్యాప్తు బృందం (SIT) కూడా ఇప్పటివరకు ఎలాంటి అధికారిక ప్రకటన విడుదల చేయలేదు. దీంతో ఆమె రెండు రోజుల పాటు ఎక్కడ ఉంది, ఎందుకు వెళ్లిందనే దానిపై సస్పెన్స్ కొనసాగుతోంది.

రెండు రోజుల ఉత్కంఠ..
సెంట్రల్ హౌరాలో నివాసం ఉంటున్న దమయంతి ఇటీవలే జాతీయ జట్టు ట్రయల్స్‌కు ఎంపికైంది. గురువారం మధ్యాహ్నం ఇంట్లో కొన్ని వస్తువులు తీసుకురావడానికి బయటకు వెళ్లి తిరిగి రాలేదు. వెళ్లేటప్పుడు ఆమె తన మొబైల్ ఫోన్‌ను వెంట తీసుకెళ్లినట్లు తల్లిదండ్రులు తెలిపారు. అప్పటి నుంచి ఆమె ఆచూకీ కోసం గాలింపు చర్యలు చేపట్టారు.

అదృశ్యమైన తర్వాత ఆమె రెండుసార్లు వేర్వేరు ప్రాంతాల్లో కనిపించడం గమనార్హం. గురువారం హౌరా స్టేషన్‌లోని సీసీటీవీ ఫుటేజ్‌లో ఆమె కనిపించింది. స్టేషన్‌లోని 4, 5 నంబర్ ప్లాట్‌ఫామ్‌ల మధ్య ఆమె తిరుగుతున్నట్లు పోలీసులు గుర్తించారు. ఆ తర్వాత శుక్రవారం మధ్యాహ్నం హుగ్లీ జిల్లాలోని ప్రసిద్ధ మహేశ్ రథయాత్రలో ఆమె కనిపించినట్లుగా వార్తలు వచ్చాయి. ఈ సమాచారం సోషల్ మీడియాలో వైరల్ కావడంతో పోలీసులు నాలుగు బృందాలను రంగంలోకి దింపి గాలింపు ముమ్మరం చేశారు.

గతంలోనూ వివాదాలు..
దమయంతి సురక్షితంగా తిరిగి రావడంపై ఆమె పొరుగువారు, తోటి షూటర్లు హర్షం వ్యక్తం చేస్తున్నారు. అయితే, పశ్చిమ బెంగాల్ షూటింగ్ వర్గాల్లో వివాదాలు చెలరేగడం ఇది మొదటిసారి కాదు. గత ఏడాది మార్చిలో అవినీతి ఆరోపణలు చేసినందుకు ఒలింపియన్, మాజీ రైఫిల్ కోచ్ జాయ్‌దీప్ కర్మాకర్‌పై పశ్చిమ బెంగాల్ రైఫిల్ అసోసియేషన్ సస్పెన్షన్ వేటు వేసింది. ప్రస్తుతానికి దమయంతి తిరిగి రావడం అందరికీ ఉపశమనం కలిగించినా, ఆమె అదృశ్యం వెనుక ఉన్న కారణాలపై స్పష్టత రావాల్సి ఉంది.