భర్త వేధింపులతో ఘోరం.. పిల్లలతో కలిసి బావిలోకి దూకిన తల్లి.. కొమ్మ పట్టుకుని బతికిన కొడుకు

నిత్యం తాగి వచ్చి వేధించే భర్తతో విసిగిపోయిన ఓ తల్లి, తన ఇద్దరు పిల్లలతో కలిసి ఆత్మహత్యకు పాల్పడిన ఘటన వికారాబాద్ జిల్లాలో తీవ్ర విషాదాన్ని నింపింది. ఈ దారుణ సంఘటనలో తల్లి, కుమార్తె ప్రాణాలు కోల్పోగా, కుమారుడు అదృష్టవశాత్తు ప్రాణాలతో బయటపడ్డాడు. వ్యవసాయ బావిలో సుమారు అరగంట పాటు ఓ చెట్టు కొమ్మను పట్టుకుని వేలాడుతూ ప్రాణాలను నిలబెట్టుకున్నాడు.

వివరాల్లోకి వెళితే.. వికారాబాద్ జిల్లా యలాల్ మండలానికి చెందిన ఊరుబాటి సుధాకర్, తన భార్య వసంత (35), కుమార్తె నవ్య (15), కుమారుడు వేణు(10)తో కలిసి బతుకుదెరువు కోసం పదేళ్ల క్రితం శంకర్‌పల్లి మండలం కొత్తపల్లి గ్రామానికి వలస వచ్చారు. అక్కడ ఓ తోటలో పనిచేసుకుంటూ కుటుంబాన్ని పోషిస్తున్నాడు. అయితే, సుధాకర్‌కు మద్యపానం అలవాటు ఉంది. ప్రతిరోజూ మద్యం మత్తులో ఇంటికి వచ్చి భార్య వసంతతో గొడవపడి, ఆమెను శారీరకంగా, మానసికంగా తీవ్రంగా వేధించేవాడు.

నిన్న‌ రాత్రి కూడా సుధాకర్ మద్యం మత్తులో భార్యతో గొడవపడ్డాడు. భర్త వేధింపులను ఇక భరించలేనని భావించిన వసంత, జీవితంపై పూర్తి విరక్తి చెందింది. తాను చనిపోతే పిల్లలు అనాథలవుతారనే ఆవేదనతో వారిని కూడా తనతోపాటే తీసుకెళ్లాలని నిర్ణయించుకుంది. అనుకున్నదే తడవుగా, అర్ధరాత్రి సమయంలో నిద్రిస్తున్న కుమార్తె నవ్య, కుమారుడు వేణును తీసుకుని సమీపంలోని వ్యవసాయ బావి వద్దకు వెళ్లింది. ముగ్గురూ ఒక్కసారిగా బావిలోకి దూకేశారు.

అయితే, నీటిలో పడుతున్న సమయంలో బాలుడు వేణుకు బావిలోపలికి వంగి ఉన్న ఒక చెట్టు కొమ్మ చేతికి తగిలింది. ఎలాగైనా బతకాలనే ఆశతో ఆ బాలుడు ఆ కొమ్మను గట్టిగా పట్టుకుని, సుమారు అరగంట పాటు ప్రాణభయంతో వేలాడుతూ ఉండిపోయాడు. మరోవైపు ఇంట్లో భార్యాపిల్లలు కనిపించకపోవడంతో ఆందోళన చెందిన సుధాకర్, చుట్టుపక్కల వెతకడం ప్రారంభించాడు. వ్యవసాయ బావి వద్దకు రాగానే లోపలి నుంచి కొడుకు అరుపులు వినిపించాయి. వెంటనే బావిలోకి చూడగా, కొడుకు కొమ్మ పట్టుకుని ప్రాణాలతో కొట్టుమిట్టాడడం చూసి, తక్షణమే బావిలోకి దూకి అతడిని బయటకు తీసి రక్షించాడు.

కానీ, అప్పటికే వసంత, నవ్య నీటిలో మునిగిపోయి ఊపిరాడక మరణించారు. ఈ ఘటనపై సమాచారం అందుకున్న శంకర్‌పల్లి పోలీసులు సంఘటనా స్థలానికి చేరుకున్నారు. స్థానికుల సహాయంతో తల్లి, కుమార్తె మృతదేహాలను వెలికితీశారు. అనంతరం కేసు నమోదు చేసి, మృతదేహాలను పోస్టుమార్టం నిమిత్తం చేవెళ్ల ప్రభుత్వ ఆసుపత్రికి తరలించారు. ఈ ఘటనపై పోలీసులు దర్యాప్తు చేస్తున్నారు.