చంద్రబాబు, నారాయణలపై సీఐడీ కేసు కొట్టేస్తూ హైకోర్టు ఘాటు వ్యాఖ్యలు!

రాష్ట్రంలో పాలకులు మారినప్పుడల్లా పాత ప్రభుత్వాల విధానపరమైన నిర్ణయాలపై క్రిమినల్ కేసులు పెట్టే రాజకీయ సంస్కృతికి ఆంధ్రప్రదేశ్ హైకోర్టు గట్టి బ్రేక్ వేసింది. అమరావతి అసైన్డ్ భూముల వ్యవహారంలో ముఖ్యమంత్రి నారా చంద్రబాబు నాయుడు, మాజీ మంత్రి పి.నారాయణలపై గత వైసీపీ ప్రభుత్వ హయాంలో నమోదైన సీఐడీ కేసును కొట్టేస్తూ న్యాయస్థానం సంచలన తీర్పు ఇచ్చింది. ఈ కేసు కేవలం రాజకీయ ప్రతీకారంతో పెట్టిందే తప్ప, ఇందులో ఎలాంటి ప్రజాప్రయోజనం లేదని హైకోర్టు న్యాయమూర్తి డాక్టర్ జస్టిస్ వై.లక్ష్మణరావు స్పష్టం చేశారు.

చట్టాన్ని బలహీనులకు రక్షణ కవచంగా వాడాలి.. ఆయుధంగా కాదు!
ప్రముఖ అంతర్జాతీయ న్యాయకోవిదుడు లార్డ్ డెన్నింగ్ చెప్పిన ప్రసిద్ధ సూత్రాలను ఈ సందర్భంగా హైకోర్టు గుర్తుచేసింది. "చట్టం అనేది శక్తిమంతుల చేతిలో ప్రత్యర్థులను అణచివేసే ఆయుధంగా మారకూడదు.. అది కేవలం బలహీనులకు రక్షణ కవచంగా మాత్రమే ఉండాలి" అని వ్యాఖ్యానించింది. ప్రభుత్వాలు తమ తర్వాత వచ్చే ప్రభుత్వం కేసులతో వేధిస్తుందనే భయం లేకుండా నిర్ణయాలు తీసుకునే స్వేచ్ఛ ఉండాలని, లేనిపక్షంలో ప్రజాస్వామ్య పునాదులే కదిలిపోతాయని కోర్టు తీవ్ర ఆందోళన వ్యక్తం చేసింది.

అసలు బాధితులే లేరు.. ఆళ్లకు ఎందుకింత ఆరాటం?
రాజధాని భూసమీకరణ కోసం తెచ్చిన జీవో 41 వల్ల తాము నష్టపోయామంటూ ఆయా గ్రామాల రైతుల్లో ఒక్కరంటే ఒక్కరు కూడా కోర్టు ముందుకు రాలేదని న్యాయస్థానం ఎత్తిచూపింది. అలాంటప్పుడు, అప్పటి మంగళగిరి ఎమ్మెల్యే ఆళ్ల రామకృష్ణారెడ్డి కేవలం రాజకీయ వైరాన్ని మనసులో పెట్టుకుని, ఐదేళ్ల సుదీర్ఘ విరామం తర్వాత 2021లో సీఐడీకి ఫిర్యాదు చేయడాన్ని కోర్టు తీవ్రంగా తప్పుపట్టింది. ఈ ఫిర్యాదు వెనుక ఎలాంటి ప్రజాప్రయోజనం లేదని, కేవలం రాజకీయ ప్రత్యర్థులను ఇబ్బంది పెట్టేందుకే చట్టాన్ని దుర్వినియోగం చేశారని ఆక్షేపించింది.

సీఐడీ దర్యాప్తు కూడా చట్టవిరుద్ధమే!
సాంకేతికంగా కూడా ఈ కేసు నిలబడదని హైకోర్టు తేల్చిచెప్పింది. నిబంధనల ప్రకారం కాగ్నిజబుల్ నేరాల్లో 'యూనిట్ ఆఫీసర్' నుంచి అధికారిక అభ్యర్థన అందిన తర్వాతే సీఐడీ రంగంలోకి దిగాలి. కానీ, ఈ కేసులో ఎమ్మెల్యే నేరుగా సీఐడీ అదనపు డీజీకి ఫిర్యాదు చేయడం, ఆయన ఆదేశాలతో విచారణ జరపడం పూర్తిగా చట్టవిరుద్ధమని కోర్టు స్పష్టం చేసింది. సీఆర్డీఏ చట్టంలోని సెక్షన్ 146 ప్రకారం కూడా ప్రభుత్వ విధాన నిర్ణయాలు తీసుకున్న వ్యక్తులపై క్రిమినల్ కేసులు పెట్టడానికి వీల్లేదని పేర్కొంటూ, చంద్రబాబు, నారాయణలపై ఉన్న కేసులను హైకోర్టు పూర్తిగా కొట్టేసింది.