తెలంగాణ కాంగ్రెస్ సంచలన నిర్ణయం: పాలభిషేకాలు, జేసీబీ గజమాలలు బంద్

తెలంగాణ ప్రదేశ్ కాంగ్రెస్‌ కమిటీ (టీపీసీసీ) కీలక నిర్ణయం తీసుకుంది. పార్టీ కార్యక్రమాల్లో భాగంగా నాయకుల ఫ్లెక్సీలు, కటౌట్లకు పాలభిషేకాలు, జలాభిషేకాలు చేయడాన్ని పూర్తిగా నిషేధించింది. అలాగే, జేసీబీలు, బుల్డోజర్లు వంటి భారీ యంత్రాల సహాయంతో నాయకులకు గజమాలలు వేయడాన్ని నిలిపివేస్తూ గురువారం ఒక సర్క్యులర్‌ను జారీ చేసింది. పార్టీ సిద్ధాంతాలకు విరుద్ధమైన ఇటువంటి పద్ధతులకు స్వస్తి పలకాలని స్పష్టం చేసింది.

టీపీసీసీ ఉపాధ్యక్షుడు టి. కుమార్‌రావు ఈ సర్క్యులర్‌ను విడుదల చేశారు. రాష్ట్ర కాంగ్రెస్ వ్యవహారాల ఇన్‌ఛార్జ్ మీనాక్షి నటరాజన్ ఆదేశాల మేరకు, టీపీసీసీ అధ్యక్షుడు మహేశ్ కుమార్ గౌడ్ సూచనలతో ఈ నిర్ణయం తీసుకున్నట్లు ఆయన తెలిపారు. ఈ నిబంధనలను ఉల్లంఘించే వారిపై కఠిన క్రమశిక్షణా చర్యలు తీసుకుంటామని హెచ్చరించారు.

"దేశంలో ఎందరో పోషకాహార లోపంతో బాధపడుతున్న తరుణంలో, పాలను వృథా చేయడం కాంగ్రెస్ పార్టీ సిద్ధాంతాలకు, ఆశయాలకు పూర్తిగా విరుద్ధం" అని సర్క్యులర్‌లో పేర్కొన్నారు. ఇటువంటి ఆడంబరాలకు బదులుగా పేదలకు అన్నదానం వంటి సేవా కార్యక్రమాలు చేపట్టాలని పార్టీ శ్రేణులకు సూచించారు.

అంతేకాకుండా, సీనియర్ నేతల పర్యటనల సందర్భంగా జేసీబీలు, బుల్డోజర్లతో భారీ దండలు వేయడాన్ని కూడా తీవ్రంగా పరిగణించారు. ఈ యంత్రాలను 'అణచివేతకు చిహ్నాలు'గా పార్టీ అభివర్ణించింది. అనవసర ఆడంబరాలకు దూరంగా ఉంటూ, ప్రజాసేవ, నిరాడంబరత అనే పార్టీ మూల సూత్రాలకు కట్టుబడి ఉండాలని ఆదేశించింది. రాజకీయాల్లో పాలాభిషేకాలు, గజమాలల సంప్రదాయం విస్తృతంగా ఉన్న నేపథ్యంలో, కాంగ్రెస్ పార్టీ తీసుకున్న ఈ నిర్ణయం ప్రాధాన్యత సంతరించుకుంది.