హైదరాబాద్ సహా ఆరు నగరాల్లో ఇంటి ఓనర్ల వద్దే నిలిచిపోయిన రూ.1.26 లక్షల కోట్ల డిపాజిట్లు

దేశంలోని ఆరు ప్రధాన నగరాల్లో అద్దెదారులు చెల్లించిన సెక్యూరిటీ డిపాజిట్లు ఏకంగా రూ.1.26 లక్షల కోట్లకు పైగా గృహ యజమానుల వద్ద నిలిచిపోయాయని తాజాగా ఓ నివేదిక వెల్లడించింది. హైదరాబాద్, ముంబై, బెంగళూరు, ఢిల్లీ-ఎన్సీఆర్, చెన్నై, పుణె నగరాల్లో ఈ పరిస్థితి నెలకొన్నట్లు 'నోబ్రోకర్ రెంట్ రిపోర్ట్ 2026' స్పష్టం చేసింది. నిరంతరం పెరుగుతున్న ఇంటి అద్దెలు, ఆర్థిక సవాళ్ల నేపథ్యంలో ఈ డిపాజిట్ల భారం అద్దెదారులకు పెను సవాలుగా మారుతోంది.

ఈ నివేదిక ప్రకారం, ముంబై మెట్రోపాలిటన్ రీజియన్ (ఎంఎంఆర్) పరిధిలో అత్యధికంగా రూ.41,156 కోట్ల డిపాజిట్లు యజమానుల వద్ద ఉండగా, బెంగళూరు రూ.31,628 కోట్లతో రెండో స్థానంలో నిలిచింది. పట్టణ ప్రాంతాల్లో నివసించే వారి నెలవారీ ఖర్చుల్లో అద్దెకే సింహభాగం వెళుతోందని, దాదాపు సగం మంది తమ ఆదాయంలో 30 శాతానికి పైగా అద్దె కోసమే వెచ్చిస్తున్నారని ఈ సర్వేలో తేలింది. ముఖ్యంగా ముంబైలో 25 శాతం మంది తమ సంపాదనలో సగానికి పైగా అద్దె రూపంలోనే చెల్లిస్తున్నారు. భారీ సెక్యూరిటీ డిపాజిట్ల కారణంగా బెంగళూరులో 75 శాతం మంది తాము కోరుకున్న ఇంటిని అద్దెకు తీసుకోలేకపోయినట్లు నివేదిక వివరించింది.

మరోవైపు, సొంత ఇల్లు కొనుగోలు చేయడంతో పోలిస్తే అద్దెకు ఉండటమే మేలని మెజారిటీ ప్రజలు భావిస్తున్నారు. 30 ఏళ్ల గృహ రుణంపై చెల్లించాల్సిన నెలవారీ వాయిదా (ఈఎంఐ) ప్రస్తుతం అద్దె కంటే గణనీయంగా పెరగడమే దీనికి ప్రధాన కారణం. 2021 నుంచి ఈ వ్యత్యాసం మరింత స్పష్టంగా కనిపిస్తోంది. హైదరాబాద్‌లో ఈఎంఐ-అద్దె నిష్పత్తి 2.21 నుంచి 2.47కి పెరగగా, బెంగళూరులో ఇది 2.07 నుంచి 2.38కి చేరింది.

ఇక డిపాజిట్ల వాపసు విషయంలోనూ అద్దెదారులకు చేదు అనుభవాలే ఎదురవుతున్నాయి. ఢిల్లీ-ఎన్సీఆర్‌లో కేవలం 58 శాతం మందికి మాత్రమే పూర్తి డిపాజిట్ తిరిగి వస్తుండగా, 30 శాతం మంది కోతలతో, మరో 12 శాతం మంది తీవ్ర వివాదాల తర్వాత తమ సొమ్మును పొందుతున్నారని నివేదిక పేర్కొంది. ఇంత భారీ మొత్తంలో డిపాజిట్లు యజమానుల వద్దే నిలిచిపోవడం వల్ల అద్దెదారుల ఆర్థిక ప్రణాళికలు, పొదుపుపై తీవ్ర ప్రభావం పడుతోందని నిపుణులు విశ్లేషిస్తున్నారు.