ఐసీసీ కొత్త రూల్స్‌.. 2027 వన్డే ప్రపంచకప్‌లో భార‌త్‌, పాక్ మూడుసార్లు త‌ల‌ప‌డే ఛాన్స్‌!

ఐసీసీ 2027లో జరిగే పురుషుల వన్డే ప్రపంచకప్‌ ఫార్మాట్‌లో కీలక మార్పులు చేసింది. ఈ కొత్త విధానం వల్ల చిరకాల ప్రత్యర్థులైన భారత్, పాకిస్థాన్ జట్లు ఒకే టోర్నీలో మూడుసార్లు తలపడే అవకాశం ఏర్పడనుంది. ఈ మార్పులు క్రికెట్ అభిమానులకు మరింత ఉత్కంఠను పంచడంతో పాటు వాణిజ్యపరంగా ఐసీసీకి భారీ లాభాలను తెచ్చిపెట్టే వ్యూహంలో భాగంగా కనిపిస్తున్నాయి.

కొత్త ఫార్మాట్ ఎలా ఉండబోతోంది?
వచ్చే ఏడాది దక్షిణాఫ్రికాలో జరిగే 2027 ప్రపంచకప్‌ టోర్నీ 14 జట్లతోనే యథావిధిగా కొనసాగనుంది. అయితే, ఫార్మాట్ పూర్తిగా మారనుంది. ఈ టోర్నమెంట్‌కు మొత్తం 14 జట్లు అర్హత సాధించినప్పటికీ, అందులో చివరి మూడు స్థానాల్లో నిలిచిన జట్ల మధ్య ప్రిలిమినరీ రౌండ్ జరుగుతుంది. ఇందులో గెలిచిన ఒకే ఒక్క జట్టు ప్రధాన గ్రూప్ దశకు అర్హత సాధిస్తుంది.

దీంతో ప్రధాన టోర్నీ 12 జట్లతో ప్రారంభమవుతుంది. ఈ 12 జట్లను ఆరు చొప్పున రెండు గ్రూపులుగా విభజిస్తారు. గ్రూప్ దశ ముగిశాక, ఇప్పటివరకు ఉన్న 'సూపర్ సిక్స్' స్థానంలో కొత్తగా 'సూపర్ సెవెన్' దశను ప్రవేశపెట్టారు. అంటే.. రెండు గ్రూపుల నుంచి మెరుగైన ప్రదర్శన చేసిన ఏడు జట్లు ఈ దశకు అర్హత సాధిస్తాయి. ఇక్కడ అన్ని జట్లు మిగిలిన జట్లతో రౌండ్ రాబిన్ పద్ధతిలో తలపడతాయి. మరో ముఖ్యమైన మార్పు ఏమిటంటే, ఈ టోర్నీలో క్వార్టర్ ఫైనల్స్ ఉండవు. సూపర్ సెవెన్ తర్వాత నేరుగా సెమీ ఫైనల్స్, ఫైనల్ జరుగుతాయి.

భారత్-పాక్ మ్యాచ్‌లే టార్గెట్‌గా..
ఈ కొత్త ఫార్మాట్ వల్ల భారత్, పాకిస్థాన్ జట్లు గరిష్ఠంగా మూడుసార్లు ఎదురుపడే అవకాశం ఉంది. గ్రూప్ దశలో ఒకసారి, సూపర్ సెవెన్ దశలో మరోసారి, ఆ తర్వాత సెమీ ఫైనల్ లేదా ఫైనల్‌లో ఇంకోసారి తలపడవచ్చు. భారత్-పాకిస్థాన్ మ్యాచ్ అంటే ఉపఖండంలో ఉండే క్రేజ్ అంతా ఇంతా కాదు. ఈ మ్యాచ్ ద్వారా ప్రసార హక్కులు, వాణిజ్య ప్రకటనల రూపంలో ఐసీసీకి భారీగా ఆదాయం సమకూరుతుంది.

ప్రస్తుతం ఇరు దేశాల మధ్య రాజకీయ ఉద్రిక్తతల కారణంగా ద్వైపాక్షిక సిరీస్‌లు జరగడం లేదు. కేవలం ఐసీసీ టోర్నమెంట్లలో మాత్రమే ఈ రెండు జట్లు ఆడుతున్నాయి. భారత్ చివరిసారిగా 2006లో పాకిస్థాన్‌లో పర్యటించింది. ఈ నేపథ్యంలో ప్రపంచకప్‌లో ఈ జట్ల మధ్య మ్యాచ్‌ల సంఖ్యను పెంచడమే లక్ష్యంగా ఐసీసీ ఈ మార్పులు చేసిందని విశ్లేషకులు భావిస్తున్నారు. అయితే, ఈ కొత్త ఫార్మాట్ టోర్నీలో మరింత పోటీతత్వాన్ని, ప్రాధాన్యతను పెంచుతుందని ఐసీసీ తన ప్రకటనలో పేర్కొంది.

టీ20 ప్రపంచకప్‌లోనూ మార్పులు
ఎడిన్‌బర్గ్‌లో జరిగిన ఐసీసీ బోర్డు సమావేశంలో 2028లో జరిగే టీ20 ప్రపంచకప్‌ ఫార్మాట్‌లో కూడా కొన్ని మార్పులకు ఆమోదం తెలిపారు. ఈ టోర్నీ 20 జట్లతోనే కొనసాగనుంది. అయితే, గ్రూప్ దశ నుంచి 8 జట్లకు బదులుగా 10 జట్లు 'సూపర్ 10' దశకు అర్హత సాధిస్తాయి. సూపర్ 10లో ఉత్తమ ప్రదర్శన చేసిన మొదటి రెండు జట్లు నేరుగా సెమీ ఫైనల్స్‌కు వెళ‌తాయి. మిగిలిన రెండు సెమీ ఫైనల్ బెర్తుల కోసం కొత్తగా 'ఎలిమినేటర్' దశను నిర్వహిస్తారు.