బంగ్లాదేశ్‌లో వధువుల కొనుగోలు అక్రమం.. తన పౌరులకు చైనా తీవ్ర హెచ్చరిక

బంగ్లాదేశ్‌లో వధువుల కొనుగోలుకు పాల్పడవద్దని చైనా ప్రభుత్వం తమ పౌరులను తీవ్రంగా హెచ్చరించింది. వివాహం పేరుతో సాగించే ఇలాంటి చర్యలను మానవ అక్రమ రవాణాగా పరిగణిస్తారని, నిబంధనలు ఉల్లంఘిస్తే బంగ్లాదేశ్ చట్టాల ప్రకారం మరణశిక్ష పడే అవకాశం కూడా ఉందని స్పష్టం చేసింది. ఈ మేరకు ఢాకాలోని చైనా రాయబార కార్యాలయం ఒక కీలక ప్రకటన విడుదల చేసింది.

బ్రోకర్లు లేదా సోషల్ మీడియా వేదికల ద్వారా పరిచయమై, పెళ్లి ముసుగులో సాగించే చట్టవ్యతిరేక కార్యకలాపాలకు దూరంగా ఉండాలని తన పౌరులకు సూచించింది. ఏవైనా అనుమానాస్పద పరిస్థితులు తలెత్తితే తక్షణమే స్థానిక పోలీసులను లేదా రాయబార కార్యాలయాన్ని సంప్రదించాలని కోరింది.

చైనాలో నెలకొన్న తీవ్రమైన లింగ అసమానతే ఈ పరిణామాలకు ప్రధాన కారణంగా తెలుస్తోంది. 2020 జనాభా లెక్కల ప్రకారం, చైనాలో వివాహ వయసులో ఉన్న మహిళల కంటే పురుషుల సంఖ్య కొన్ని మిలియన్లు అధికంగా ఉంది. ఈ అంతరం కారణంగా, బంగ్లాదేశ్ వంటి పొరుగు దేశాల నుంచి మహిళలను లక్ష్యంగా చేసుకుని సరిహద్దుల్లో అక్రమ రవాణా ముఠాలు క్రియాశీలకంగా మారాయని నివేదికలు స్పష్టం చేస్తున్నాయి.

విదేశాల్లో స్థానిక చట్టాలను ఉల్లంఘించడం వల్ల వ్యక్తిగత స్వేచ్ఛకు భంగం కలగడమే కాకుండా, కొన్ని సందర్భాల్లో ప్రాణాలకే ముప్పు వాటిల్లుతుందని రాయబార కార్యాలయం హెచ్చరించింది. చట్టబద్ధమైన నిబంధనలను గౌరవించాలని, వధువుల కొనుగోలు వంటి నేరపూరిత చర్యలకు దూరంగా ఉండాలని విజ్ఞప్తి చేసింది.