ఇరాక్‌ నుంచి తప్పుకోనున్న అమెరికా సైన్యం: శ్వేతసౌధంలో డొనాల్డ్ ట్రంప్ సంచలన ప్రకటన!

ఇరాక్‌లో వందలాది అమెరికా సైనిక బలగాల మోహరింపునకు త్వరలోనే తెరపడనుంది. ఇరాక్‌లో ఇకపై తమ సైనిక ఉనికి అవసరం లేదని అమెరికా అధ్యక్షుడు డొనాల్డ్ ట్రంప్ సంచలన ప్రకటన చేశారు. శ్వేతసౌధంలో ఇరాక్ ప్రధానమంత్రి అలీ అల్-జైదీతో సమావేశమైన అనంతరం ట్రంప్ మీడియాతో మాట్లాడారు. ఇరు దేశాల మధ్య సంబంధాలు ఇకపై సైనిక పరంగా కాకుండా.. వాణిజ్యం, పెట్టుబడులు, ఇంధన రంగాల చుట్టూ కేంద్రీకృతమై సరికొత్త దశకు చేరుకున్నాయని ఆయన స్పష్టం చేశారు. ఈ ఏడాది సెప్టెంబర్ 30 నాటికి అమెరికా రక్షణ దళాలు పూర్తిగా ఇరాక్‌ను వీడి వెళ్లనున్నట్లు ఇరాక్ ప్రధాని కూడా ధ్రువీకరించారు.

సైన్యం అవుట్.. ఆయిల్ కంపెనీలు ఇన్!
"ఇరాక్‌లో ఇకపై మా సైన్యం ఉండాల్సిన అవసరం లేదని మేము భావిస్తున్నాము" అని ఓవల్ ఆఫీస్ సమావేశంలో ట్రంప్ విలేకరులతో అన్నారు. అమెరికాకు చెందిన ప్రముఖ చమురు సంస్థలు ఇరాక్‌లో పెట్టుబడులు పెట్టడానికి సిద్ధంగా ఉన్నాయని, ఇప్పటికే అక్కడ స్థానిక భాగస్వామ్యాలు ప్రారంభమయ్యాయని ట్రంప్ వెల్లడించారు. ఈ వారంలో లేదా వచ్చే వారంలో చరిత్రలోనే అత్యంత భారీ చమురు ఒప్పందాలను అధికారికంగా ప్రకటించబోతున్నట్లు ఆయన పేర్కొన్నారు. అవసరమైతే ఇరాక్ రక్షణకు సహాయం అందిస్తామని, కానీ ప్రస్తుత పరిస్థితుల్లో ఆ అవసరం రాకపోవచ్చని ధీమా వ్యక్తం చేశారు.

ఇరాన్ బలహీనపడటమే కారణం
పశ్చిమాసియాలో భద్రతా వాతావరణం మారడానికి ఇరాన్ బలహీనపడటమే ప్రధాన కారణమని ట్రంప్ విశ్లేషించారు. "పశ్చిమాసియాలో ఇరాన్ ఇప్పుడు పూర్తిగా అస్థిరపడింది. నాలుగు నెలల క్రితంతో పోలిస్తే ప్రస్తుతం వారి సైనిక శక్తి గణనీయంగా పడిపోయింది. కాబట్టి ఇరాక్ వైపు నుండి భద్రతాపరమైన ముప్పు చాలా వరకు తప్పినట్లే" అని ట్రంప్ అభిప్రాయపడ్డారు. ఈ ప్రాంతంలో ఉద్రిక్తతలు తగ్గడం వల్లే అమెరికా కంపెనీలు ఇరాక్‌లో మునుపెన్నడూ లేని స్థాయిలో పెట్టుబడులు పెట్టేందుకు ముందుకు వస్తున్నాయని చెప్పారు.

ఆయుధాలు కేవలం ప్రభుత్వం వద్దే.. ఇరాక్ ప్రధాని స్పష్టత
తమ అమెరికా పర్యటన కేవలం సాధారణ పర్యటన కాదని, ఇరు దేశాల మధ్య బలమైన ఆర్థిక భాగస్వామ్యానికి ఇదొక నాంది అని ఇరాక్ ప్రధాని అలీ అల్-జైదీ అభివర్ణించారు. "సెప్టెంబర్ 30 నాటికి అమెరికా సైన్యం మా దేశం నుండి వెళ్ళిపోతుంది, కానీ అమెరికా వ్యాపార సంస్థలు మాత్రం ఇరాక్‌లోనే ఉండిపోతాయి" అని ఆయన పేర్కొన్నారు. 

అలాగే తమ దేశ భద్రతా అజెండాను స్పష్టం చేస్తూ.. ఇరాక్‌లో ఆయుధాలు కలిగి ఉండే హక్కు కేవలం ప్రభుత్వానికే ఉంటుందని, ఇది తమ నిర్ణయమే తప్ప ప్రత్యామ్నాయం కాదని చెప్పారు. సెప్టెంబర్ 30 తర్వాత దేశంలో ఎలాంటి సాయుధ ముఠాల ఉనికిని, ప్రభుత్వ నియంత్రణకు వెలుపల ఆయుధాలు పట్టుకుని తిరిగే ఏ శక్తినీ ఇరాక్ అంగీకరించబోదని జైదీ స్పష్టం చేశారు. ఐసిస్  ఉగ్రవాద నిర్మూలన కోసం కొన్నేళ్లుగా ఇరాక్‌లో ఉన్న అమెరికా సంకీర్ణ దళాలు, ఇకపై కేవలం శిక్షణ, నిఘా సహకారం, ఆర్థిక బంధాలకే పరిమితం కానున్నాయి.