ఏఐ కోసం రెండుసార్లు మూల్యం చెల్లిస్తున్నారు.. కంపెనీలకు సత్య నాదెళ్ల వార్నింగ్‌!

ఆర్టిఫిషియల్ ఇంటెలిజెన్స్ (ఏఐ) వాడకంలో కంపెనీలు తమకు తెలియకుండానే రెండుసార్లు మూల్యం చెల్లిస్తున్నాయని మైక్రోసాఫ్ట్ సీఈఓ, భారత సంతతికి చెందిన సత్య నాదెళ్ల హెచ్చరించారు. ఒకటి డబ్బు రూపంలో అయితే, రెండోది అంతకంటే విలువైన తమ సొంత యాజమాన్య పరిజ్ఞానాన్ని కోల్పోవడం ద్వారా అని ఆయన తన వ్యక్తిగత బ్లాగ్‌లో విశ్లేషించారు. ఏఐ మోడల్ మెరుగ్గా పనిచేయాలంటే, దానికి మన సంస్థకు సంబంధించిన ఎక్కువ సమాచారాన్ని అందించాల్సి ఉంటుందని, ఈ క్రమంలో కంపెనీలు తమ విలువైన జ్ఞానాన్ని కోల్పోతున్నాయని ఆయన ఆందోళన వ్యక్తం చేశారు.

ఈ అంశాన్ని వివరించేందుకు నాదెళ్ల, నోబెల్ బహుమతి గ్రహీత, ఆర్థికవేత్త కెన్నెత్ ఆరో ప్రతిపాదించిన 'ఇన్ఫర్మేషన్ పారడాక్స్' (సమాచార వైరుధ్యం) సిద్ధాంతాన్ని ప్రస్తావించారు. ఆరో సిద్ధాంతం ప్రకారం, ఒక సమాచారం విలువ ఏంటో తెలియకుండా కొనుగోలుదారు దాన్ని కొనలేడు, కానీ ఒకసారి ఆ సమాచారం తెలిశాక, దానికోసం చెల్లించాల్సిన అవసరం ఉండదు. 

అయితే, ఏఐ యుగంలో ఈ సమస్య తలకిందులై 'రివర్స్ ఇన్ఫర్మేషన్ పారడాక్స్'గా మారిందని నాదెళ్ల అభిప్రాయపడ్డారు. ఇక్కడ కొనుగోలు చేసిన ఏఐ సాధనాన్ని వినియోగించుకోవడం కోసం, కొనుగోలుదారుడే తన విలువైన పరిజ్ఞానాన్ని విక్రేతకు (ఏఐ ప్రొవైడర్) అప్పగించాల్సి వస్తోందని వివరించారు. మణిపాల్‌లో ఎలక్ట్రికల్ ఇంజనీరింగ్ చదివిన నాదెళ్ల, ఈ ప్రక్రియ వల్ల ఏఐ ప్రొవైడర్లకు, వాడుకదారులైన కంపెనీలకు మధ్య సమాచార అసమానత పెరుగుతుందని హెచ్చరించారు.

పరిష్కారం ఏమిటి?
ఈ సమస్యకు పరిష్కారంగా కంపెనీలు తమ 'లెర్నింగ్ లూప్' (learning loop)పై పూర్తి నియంత్రణ సాధించాలని నాదెళ్ల సూచించారు. ఉద్యోగులు ఏఐకి ఇచ్చే ప్రతి ప్రాంప్ట్, ఏఐ తప్పు చేసినప్పుడు అందించే సవరణలు, రూపొందించే వర్క్‌ఫ్లోలు వంటివన్నీ విలువైన సంస్థాగత పరిజ్ఞానంగా మారతాయని ఆయన అన్నారు. కాలక్రమేణా ఇదే ఒక కంపెనీకి పోటీలో ఆధిక్యాన్ని అందిస్తుందని, అలాంటి పరిజ్ఞానాన్ని తెలియకుండా ఏఐ ప్రొవైడర్లకు అప్పగించకూడదని స్పష్టం చేశారు.

కంపెనీలు తమ అంతర్గత సమాచారం, కస్టమర్లతో జరిపే సంభాషణలు, ఏఐ ద్వారా పొందిన విశ్లేషణలు వంటివి తమ అనుమతి లేకుండా బయటి ఏఐ మోడళ్ల అభివృద్ధికి ఉపయోగపడకుండా ఒక కొత్త 'ట్రస్ట్ బౌండరీ' (విశ్వసనీయత సరిహద్దు) ఏర్పాటు చేసుకోవాలని నాదెళ్ల పిలుపునిచ్చారు. అంతేకాకుండా, వ్యాపార సంస్థలు ఒకే ఏఐ ప్రొవైడర్‌పై ఆధారపడకుండా ఉండాలని గట్టిగా సూచించారు. వేర్వేరు ఏఐ మోడళ్ల మధ్య సులభంగా మారగలిగే వ్యవస్థలను నిర్మించుకోవడం ద్వారా ఖర్చులను నియంత్రించుకోవచ్చని, వెండర్ లాక్-ఇన్ సమస్యను అధిగమించవచ్చని ఆయన వివరించారు. ఏఐ యుగంలో నిజమైన పోటీతత్వం కేవలం టెక్నాలజీని వాడటంలో కాదని, దాని వాడకం ద్వారా సృష్టించబడిన పరిజ్ఞానాన్ని సొంతం చేసుకోవడంలోనే ఉందని ఆయన తన వాదనను ముగించారు.