చెన్నైలో కొత్త ఇంట్లోకి శ్రుతి.. గృహప్రవేశానికి దూరంగా కమల్ హాసన్

ప్రముఖ నటి శ్రుతి హాసన్ తన జీవితంలో ఒక కొత్త అధ్యాయాన్ని ప్రారంభించారు. చెన్నైలో కొనుగోలు చేసిన కొత్త ఇంట్లోకి ఆమె అడుగుపెట్టారు. నిన్న‌ తన నూతన గృహంలో సంప్రదాయబద్ధంగా గృహప్రవేశ పూజను శాస్త్రోక్తంగా నిర్వహించారు. ఈ వేడుకకు సంబంధించిన ఫొటోలను ఆమె సోషల్ మీడియాలో పంచుకోవడంతో అభిమానులు శుభాకాంక్షలు తెలుపుతున్నారు.

ఈ పూజా కార్యక్రమంలో శ్రుతి హాసన్ చాలా నిరాడంబరంగా, సంప్రదాయ దుస్తుల్లో కనిపించారు. తక్కువ ఆభరణాలు ధరించి పూజలో కూర్చున్న ఫొటోలతో పాటు ఈ సందర్భంగా సిద్ధం చేసిన పిండివంటలు, కొత్త ఇంటి తాళాలను కూడా ఆమె షేర్ చేశారు. చెన్నైలో ఆమె కొత్త ప్రయాణం ప్రారంభించడంపై అభిమానులు సంతోషం వ్యక్తం చేస్తూ, సోషల్ మీడియా వేదికగా అభినందనలు తెలియజేస్తున్నారు.

గైర్హాజరైన కుటుంబ సభ్యులు
అయితే, ఈ ముఖ్యమైన కార్యక్రమానికి శ్రుతి తండ్రి, ప్రముఖ నటుడు కమల్ హాసన్, సోదరి అక్షర హాసన్‌తో పాటు ఇతర కుటుంబ సభ్యులు హాజరుకాకపోవడం గమనార్హం. కేవలం కొద్దిమంది సన్నిహితులు, స్నేహితుల సమక్షంలోనే ఈ వేడుకను నిరాడంబరంగా పూర్తి చేశారు. వారి గైర్హాజరుకు గల కారణాలపై హాసన్ కుటుంబం నుంచి ఎలాంటి అధికారిక ప్రకటన రాలేదు. అయితే, సోషల్ మీడియాలో దీనిపై పలు ఊహాగానాలు వినిపిస్తున్నాయి.

కొన్నేళ్లుగా ముంబై, చెన్నై మధ్య ప్రయాణాలు చేస్తూ గడిపిన శ్రుతి, ఇప్పుడు చెన్నైలో స్థిరపడటం ఆమె నగరంతో ఉన్న అనుబంధాన్ని తెలియజేస్తోంది. గతంలో ముంబైలోని ఆమె ఇల్లు తన కళాత్మక అభిరుచులకు అద్దం పట్టేలా ఉండేది. ఇప్పుడు చెన్నైలోని కొత్త ఇంటిని కూడా తనదైన శైలిలో ఎలా తీర్చిదిద్దుకుంటారోనని అభిమానులు ఆసక్తిగా ఎదురుచూస్తున్నారు.

కెరీర్ పరంగా చూస్తే.. శ్రుతి హాసన్ ప్రస్తుతం ఫుల్ బిజీగా ఉన్నారు. ఇటీవలే రామ్ చరణ్ నటించిన 'పెద్ది' చిత్రంలో ఓ ప్రత్యేక గీతంలో మెరిశారు. ప్రస్తుతం ఆమె విజయ్ సేతుపతితో కలిసి మిస్కిన్ దర్శకత్వంలో నటిస్తున్న 'ట్రైన్' సినిమాపై భారీ అంచనాలున్నాయి. వీటితో పాటు 'ఆకాశంలో ఒక తార' అనే మరో చిత్రం, పలు మ్యూజిక్ ప్రాజెక్టులతో ఆమె కెరీర్ పరంగా జోరు చూపిస్తున్నారు.