ఆపిల్ ఐఫోన్ 17 నో స్టాక్... కారణం ఇదే!

భారత మార్కెట్‌లో యాపిల్ ఐఫోన్ 17 మోడళ్లకు తీవ్ర కొరత నెలకొంది. సమీప భవిష్యత్తులో ధరలు పెరిగే అవకాశం ఉందన్న అంచనాల నేపథ్యంలో, వినియోగదారులు వీటి కొనుగోలుకు భారీగా మొగ్గు చూపుతుండటంతో ఈ పరిస్థితి తలెత్తింది. గత పది రోజులుగా ప్రముఖ ఈ-కామర్స్ ప్లాట్‌ఫామ్‌లతో పాటు రిటైల్ స్టోర్లలోనూ ఐఫోన్ 17 బేస్ మోడల్ నిల్వలు వేగంగా నిండుకుంటున్నాయి. అమెజాన్, ఫ్లిప్‌కార్ట్ వంటి ఆన్‌లైన్ వెబ్‌సైట్లు, ఆఫ్‌లైన్ అవుట్‌లెట్‌లలో పలు వేరియంట్లు, కలర్ ఆప్షన్లు ఇప్పటికే ‘అవుట్ ఆఫ్ స్టాక్’గా దర్శనమిస్తున్నాయి.

మెమరీ చిప్‌ల ధరల పెరుగుదల దృష్ట్యా కొన్ని ఉత్పత్తుల ధరలను పెంచక తప్పడం లేదని యాపిల్ సీఈఓ టిమ్ కుక్ ఇటీవల సంకేతాలిచ్చారు. ఈ క్రమంలోనే కంపెనీ ఇప్పటికే ఐప్యాడ్, మ్యాక్ మోడళ్ల ధరలను సవరించింది. ప్రస్తుతానికి ఐఫోన్ ధరల్లో ఎలాంటి మార్పు చేయకపోయినప్పటికీ, భవిష్యత్తులో ఏ క్షణమైనా ధరలు పెరగొచ్చనే ఆందోళన వినియోగదారులను వెంటాడుతోంది. ఫలితంగా, ముందస్తుగానే ఫోన్లను కొనుగోలు చేసేందుకు వారు ఆసక్తి కనబరుస్తున్నారు.

ప్రపంచవ్యాప్తంగా ఏఐ డేటా సెంటర్ల నుంచి డిమాండ్ పెరగడంతో మెమరీ, స్టోరేజ్ చిప్‌ల కొరత ఏర్పడింది. ఇదే తరుణంలో భారతదేశంలో శాంసంగ్, ఒప్పో, వివో, రియల్‌మీ వంటి సంస్థలు ఇప్పటికే తమ హ్యాండ్‌సెట్ల ధరలను పెంచాయి. ఈ పరిణామాల నేపథ్యంలో, ఐఫోన్ 17 ధరలు కూడా పెరిగే అవకాశం ఉందని భావిస్తున్న వినియోగదారులకు, ఇదే సరైన సమయమని రిటైలర్లు సూచిస్తున్నారు. యాపిల్ నుంచి దీనిపై అధికారిక ప్రకటన వెలువడనప్పటికీ, మార్కెట్‌లో నెలకొన్న అంచనాలు, ఊహాగానాలే ప్రస్తుత కొరతకు ప్రధాన కారణమవుతున్నాయి.