సంగీత ప్రపంచంలో తీరని లోటు.. జానకమ్మ మృతి పట్ల ప్రధాని, రాష్ట్ర‌ప‌తి ప్రగాఢ సంతాపం

ప్రఖ్యాత సినీ గాయని, ‘దక్షిణ భారత కోకిల’గా పేరుగాంచిన ఎస్. జానకి (88) శనివారం మైసూరులో కన్నుమూశారు. ఆరు దశాబ్దాలకు పైగా సాగిన తన అద్భుతమైన ప్రస్థానంలో, ఆమె దాదాపు 20 భారతీయ భాషలలో వేలాది పాటలను ఆలపించి సంగీత ప్రియుల హృదయాల్లో చెరగని ముద్ర వేశారు. జానకి మృతి పట్ల ప్రధానమంత్రి నరేంద్ర మోదీ, రాష్ట్రపతి ద్రౌపది ముర్ము తీవ్ర దిగ్భ్రాంతి వ్యక్తం చేస్తూ ప్రగాఢ సంతాపం తెలిపారు. ఆమె సంగీత సేవలను స్మరించుకుంటూ నివాళులు అర్పించారు.

జానకి మృతిపై ప్రధాని నరేంద్ర మోదీ ‘ఎక్స్’ (ట్విట్టర్) వేదికగా స్పందించారు. "ప్రఖ్యాత గాయని ఎస్. జానకి అమ్మ మరణం సంగీత, సాంస్కృతిక ప్రపంచానికి తీరని లోటు. వివిధ భాషలలో ఆమె పాడిన పాటలు తరతరాలుగా ప్రజాదరణ పొందాయి. ఆమె ప్రతి భావోద్వేగానికి అసమానమైన గాంభీర్యంతో, వైవిధ్యంతో ప్రాణం పోశారు. ఆమె మధురమైన స్వరాలు రాబోయే తరాల శ్రోతలను మంత్రముగ్ధులను చేస్తూనే ఉంటాయి. ఈ దుఃఖ సమయంలో ఆమె కుటుంబానికి, అసంఖ్యాక అభిమానులకు, సంగీత ప్రపంచానికి నా ప్రగాఢ సానుభూతి. ఓం శాంతి" అని మోదీ తన పోస్ట్‌లో పేర్కొన్నారు.

రాష్ట్రపతి ద్రౌపది ముర్ము సైతం జానకి మృతికి సంతాపం తెలిపారు. "దిగ్గజ గాయని ఎస్. జానకి అమ్మ మరణంతో భారతదేశం ఒక సంగీత శిఖరాన్ని కోల్పోయింది. ఆమె అసాధారణ గానం తరతరాలను ఉర్రూతలూగించింది. ఆరు దశాబ్దాలకు పైగా సాగిన ఆమె కీర్తిప్రతిష్టలు పొందిన ప్రస్థానంలో హిందీ, ఒడియా, తుళు, ఉర్దూ, పంజాబీ, బెంగాలీ సహా దాదాపు 20 భారతీయ భాషలలో వేలాది పాటలను రికార్డ్ చేశారు. ఆమె కాలాతీత సంగీతం ఎల్లప్పుడూ విలువైనదిగా నిలిచిపోతుంది. ఆమె కుటుంబ సభ్యులకు, అసంఖ్యాక అభిమానులకు నా ప్రగాఢ సానుభూతిని తెలియజేస్తున్నాను" అని రాష్ట్రపతి తన ‘ఎక్స్’ సందేశంలో పేర్కొన్నారు. తన సుమధుర గానంతో భారతీయ సినీ సంగీతంలో ప్రత్యేక స్థానాన్ని సంపాదించుకున్న జానకి మరణవార్తతో సంగీత లోకం శోకసంద్రంలో మునిగిపోయింది.