హెచ్-1బీ, గ్రీన్ కార్డ్ దరఖాస్తుదారులకు అలర్ట్.. సంతకంపై యూఎస్ కొత్త రూల్స్.. చిన్న పొరపాటుకూ తిరస్కరణ!

అమెరికాలో ఉద్యోగం, స్థిర నివాసం కోసం ప్రయత్నిస్తున్న లక్షలాది మందికి ఇది అత్యంత ముఖ్యమైన సమాచారం. హెచ్-1బీ వీసా, గ్రీన్ కార్డ్ సహా అన్ని రకాల వలస దరఖాస్తులపై సంతకాల విషయంలో యూఎస్ సిటిజన్‌షిప్ అండ్ ఇమ్మిగ్రేషన్ సర్వీసెస్ (యూఎస్‌సీఐఎస్) కొత్త, కఠినమైన నిబంధనలను నేటి (జులై 10) నుంచి నుంచి అమలులోకి తెచ్చింది. 

ఈ కొత్త నిబంధనల ప్రకారం దరఖాస్తులపై సరైన సంతకం లేకపోతే, వాటిని వెంటనే తిరస్కరించనున్నారు. ఈ మార్పుల వల్ల దరఖాస్తుల ప్రాసెసింగ్‌లో జాప్యం జరగకుండా ఉండాలంటే, దరఖాస్తుదారులు చాలా అప్రమత్తంగా ఉండాలని నిపుణులు సూచిస్తున్నారు.

మోసాలను అరికట్టడమే లక్ష్యం
వలస వ్యవస్థలో సమగ్రతను కాపాడటానికి, మోసపూరిత దరఖాస్తులను అరికట్టడానికి, దరఖాస్తుదారుల అసలైన గుర్తింపును ధ్రువీకరించుకోవడానికే ఈ మార్పులు చేస్తున్నట్లు యూఎస్‌సీఐఎస్ ఒక ప్రకటనలో స్పష్టం చేసింది. 

"సరిగ్గా లేని సంతకంతో ఉన్న ఏ దరఖాస్తునైనా తిరస్కరించి, దరఖాస్తుదారునికి తిరిగి పంపిస్తాము. సంతకాన్ని సరిదిద్దుకోవడానికి అవకాశం ఇవ్వబడదు. అయితే, దరఖాస్తుదారుడు సరైన సంతకంతో మళ్లీ కొత్తగా దరఖాస్తు చేసుకోవచ్చు. ఫీజు చెల్లింపుతో సహా మిగతా అన్ని అర్హతలు ఉంటే, తిరిగి సమర్పించిన దరఖాస్తును స్వీకరిస్తాము" అని యూఎస్‌సీఐఎస్ వివరించింది. 

ప్రారంభంలో దరఖాస్తును స్వీకరించినప్పటికీ, తదుపరి పరిశీలనలో సంతకం సరిగ్గా లేదని తేలితే తిరస్కరించే లేదా తిరస్కరణకు గురయ్యే అవకాశం ఉందని స్పష్టం చేసింది.

ఏవి సరైన సంతకాలు?.. ఏవి చెల్లవు?
యూఎస్‌సీఐఎస్ ప్రకారం కేవలం చేతితో పెన్ను ఉపయోగించి పెట్టిన అసలైన సంతకాలను మాత్రమే ప్రామాణికంగా పరిగణిస్తారు. ఒకవేళ ఆన్‌లైన్‌లో దరఖాస్తు చేస్తే, చేతితో సంతకం చేసిన ఫారమ్‌ను స్కాన్ చేసి, ఆ కాపీని అప్‌లోడ్ చేయవచ్చు. ఫొటోకాపీ లేదా ఫ్యాక్స్ చేసిన సంతకాలు కూడా చెల్లుబాటు అవుతాయి. అయితే, యూఎస్‌సీఐఎస్ ప్రత్యేకంగా అనుమతించిన ఆన్‌లైన్ దరఖాస్తుల్లో తప్ప, మిగతా చోట్ల ఎలక్ట్రానిక్ సంతకాలు చెల్లవు.

కింది రకాల సంతకాలు తిరస్కరణకు గురవుతాయి:

• సంతకం స్థానంలో పేరును టైప్ చేయడం.
• డిజిటల్ సిగ్నేచర్ సాఫ్ట్‌వేర్ లేదా జనరేటర్ల ద్వారా సృష్టించిన సంతకాలు.
• సిగ్నేచర్ స్టాంపులు లేదా ఆటో-పెన్ ద్వారా పెట్టిన సంతకాలు.
• మైనర్లు లేదా సంతకం చేయలేని పరిస్థితుల్లో ఉన్న వయోజనులు మినహా, దరఖాస్తుదారుల తరఫున న్యాయవాదులు లేదా ప్రతినిధులు పెట్టే సంతకాలు.

దరఖాస్తుదారులు ఏం చేయాలి?

• హెచ్-1బీ, గ్రీన్ కార్డ్ వంటి కీలకమైన దరఖాస్తులు తిరస్కరణకు గురికాకుండా ఉండాలంటే, దరఖాస్తుదారులు కొన్ని జాగ్రత్తలు తప్పనిసరిగా పాటించాలి. 
• ప్రతి ఫారమ్‌పై స్వయంగా చేతితోనే సంతకం చేయాలి. 
• ఆన్‌లైన్‌లో సమర్పించేటప్పుడు, సంతకం చేసిన ఫారమ్ స్కాన్ కాపీని మాత్రమే అప్‌లోడ్ చేయాలి. 
• దరఖాస్తులోని ప్రతి సంతకం ఫీల్డ్‌ను పూరించారో లేదో ఒకటికి రెండుసార్లు సరిచూసుకోవడం చాలా ముఖ్యం. భవిష్యత్ అవసరాల కోసం, సంతకం చేసిన అసలు పత్రాలను తమ వద్ద భద్రపరుచుకోవడం మంచిది. 
• ఈ చిన్న జాగ్రత్తలు తీసుకోకపోతే, దరఖాస్తు తిరస్కరణకు గురై, మొత్తం ప్రక్రియ ఆలస్యమయ్యే ప్రమాదం ఉంది.