కామవాంఛతో మూడేళ్ల పసిపాప ప్రాణం తీశాడు.. 65 ఏళ్ల వృద్ధుడికి ఉరిశిక్ష విధించిన కోర్టు

సమాజం సిగ్గుతో తలదించుకునేలా జరిగిన ఓ దారుణమైన ఘటనలో పుణే కోర్టు సంచలన తీర్పు వెలువరించింది. మూడేళ్ల చిన్నారిపై అత్యాచారానికి పాల్పడి, అత్యంత పాశవికంగా హత్య చేసిన కేసులో 65 ఏళ్ల భీమ్‌రావు కాంబ్లే అనే వృద్ధుడికి మరణశిక్ష విధిస్తూ నేడు తీర్పు ఇచ్చింది. ఈ నేరాన్ని 'అరుదైన వాటిలో అత్యంత అరుదైనది'గా అభివర్ణించిన న్యాయస్థానం, నిందితుడి క్రూరత్వానికి ఎలాంటి క్షమాభిక్ష తగదని స్పష్టం చేసింది.

పుణే జిల్లా మరియు సెషన్స్ కోర్టు జడ్జి ఎస్.ఆర్. సాలుంఖే ఈ తీర్పును వెలువరించారు. కిడ్నాప్, అత్యాచారం, హత్య వంటి అభియోగాలపై కాంబ్లేను దోషిగా నిర్ధారించిన కొద్ది రోజులకే శిక్షను ఖరారు చేశారు.

అసలేం జరిగిందంటే..!
పుణే జిల్లాలోని నస్రాపూర్ గ్రామంలో మే 1వ తేదీన ఈ దారుణం చోటుచేసుకుంది. పోలీసుల దర్యాప్తు ప్రకారం, నిందితుడు భీమ్‌రావు కాంబ్లే.. చిన్నారికి తినుబండారాలు ఆశచూపి, కొత్తగా పుట్టిన దూడను చూపిస్తానని నమ్మించి తన వెంట తీసుకెళ్లాడు. అనంతరం సమీపంలోని పశువుల పాక దగ్గర ఉన్న ఓ షెడ్‌లోకి బాలికను తీసుకెళ్లి లైంగిక దాడికి పాల్పడ్డాడు. ఆ తర్వాత చిన్నారి నోరు నొక్కి, ఛాతీపై గాయపరిచి కిరాతకంగా చంపేశాడు. ఈ దాడి సమయంలోనే బాలిక ప్రాణాలు కోల్పోయినట్లు తేలింది.

పాప కనిపించకపోవడంతో కుటుంబ సభ్యులు గాలింపు చేపట్టగా, ఈ దారుణం వెలుగులోకి వచ్చింది. వెతుకులాటలో బాలిక మృతదేహం లభించింది. ఆ ప్రాంతంలోని సీసీటీవీ ఫుటేజీని పరిశీలించగా, కాంబ్లే పాపను తీసుకెళుతున్న దృశ్యాలు రికార్డయ్యాయి. దీని ఆధారంగా పోలీసులు అతడిని గుర్తించి అరెస్టు చేశారు.

'అరుదైన కేసు'గా పరిగణించిన కోర్టు
విచారణ సమయంలో, ఈ కేసు సుప్రీంకోర్టు నిర్వచించిన "అరుదైన వాటిలో అత్యంత అరుదైనది" అనే వర్గంలోకి వస్తుందని ప్రాసిక్యూషన్ వాదించింది. ఇందుకు మద్దతుగా మరణశిక్షపై సుప్రీంకోర్టు ఇచ్చిన 12 కీలక తీర్పులను ప్రస్తావించింది. 

ప్రాసిక్యూషన్ వాదనలతో ఏకీభవించిన న్యాయమూర్తి, నేరం జరిగిన తీరు, దానిలోని క్రూరత్వం చూస్తే నిందితుడిపై జాలి చూపడానికి ఏమాత్రం ఆస్కారం లేదని స్పష్టం చేశారు. 

"ఈ నేరం అమాయక, నిస్సహాయ చిన్నారిపై జరిగిన అమానవీయ హింస. కేవలం కామవాంఛను తీర్చుకోవడం కోసం ఈ హత్య జరిగింది. ఇది సమాజ అంతరాత్మను సైతం కదిలించివేసింది" అని జడ్జి సాలుంఖే వ్యాఖ్యానించినట్లు వార్తా సంస్థ పీటీఐ నివేదించింది.

నిందితుడికి గతంలోనూ ఓ లైంగిక దాడి కేసులో ప్రమేయం ఉందని, చట్టపరమైన పరిణామాల గురించి తెలిసినా పశ్చాత్తాపం చూపలేదని కోర్టు పేర్కొంది. "ఈ వయసులో కూడా నిందితుడి కామవాంఛ చల్లారలేదు. అది ప్రమాదకర స్థాయికి చేరింది" అని న్యాయమూర్తి తీవ్రంగా వ్యాఖ్యానించారు.

రికార్డు సమయంలో దర్యాప్తు.. సీఎం ప్రశంసలు
ఈ కేసుకు ఇంత త్వరగా శిక్ష పడటానికి పోలీసు, ప్రాసిక్యూషన్ వర్గాల సమన్వయమే కారణమని పుణే ఎస్పీ సందీప్ సింగ్ గిల్ తెలిపారు. రాత్రింబవళ్లు పనిచేసి, కేవలం 15 రోజుల్లోనే కీలక సాక్ష్యాలను సేకరించామన్నారు. 1,200 పేజీల చార్జిషీట్‌ను దాఖలు చేశామని, మొత్తం 55 మంది సాక్షులు వాంగ్మూలం ఇచ్చారని పేర్కొన్నారు. నిందితుడికి జీవిత ఖైదు విధించాలని అతని తరఫు న్యాయవాది కోరినా, దయ చూపాల్సిన అవసరం లేదని కోర్టు స్పష్టం చేసిందని గిల్ వివరించారు.

ఈ తీర్పును మహారాష్ట్ర ముఖ్యమంత్రి దేవేంద్ర ఫడ్నవీస్ స్వాగతించారు. ఇలాంటి నేరస్థులకు సమాజంలో స్థానం లేదని అన్నారు. పుణే గ్రామీణ పోలీసులు అత్యంత వేగంగా దర్యాప్తు పూర్తి చేయడం వల్లే ఈ తీర్పు సాధ్యమైందని, ఎస్పీ సందీప్ సింగ్ గిల్, స్పెషల్ పబ్లిక్ ప్రాసిక్యూటర్ అజయ్ మిసార్‌లను ఆయన అభినందించారు.