ఏసీబీ వలలో మరో పెద్ద చేప... నిజామాబాద్ ఎక్సైజ్ సూపరింటెండెంట్ అరెస్ట్.. రూ.3 కోట్ల అక్రమాస్తులు గుర్తింపు

తెలంగాణలో అవినీతి అధికారులపై ఏసీబీ (అవినీతి నిరోధక శాఖ) వరుస దాడులు కొనసాగిస్తోంది. తాజాగా, ఆదాయానికి మించిన ఆస్తుల కేసులో నిజామాబాద్ జిల్లా ప్రొహిబిషన్ అండ్ ఎక్సైజ్ సూపరింటెండెంట్ కొమ్మురి మల్లారెడ్డిని ఏసీబీ అధికారులు మంగళవారం అరెస్ట్ చేశారు.

అవినీతి కార్యకలాపాలకు పాల్పడి, అక్రమ మార్గాల్లో ఆదాయానికి మించి ఆస్తులు కూడబెట్టారన్న ఆరోపణలతో మల్లారెడ్డిపై ఏసీబీ కేసు నమోదు చేసింది. ఇందులో భాగంగా మంగళవారం మల్లారెడ్డి నివాసంతో పాటు ఆయన బంధువులు, బినామీలకు చెందిన మొత్తం 10 ప్రాంతాల్లో ఏకకాలంలో సోదాలు నిర్వహించింది.

ఈ సోదాల్లో ఐదు భవనాలు (నాలుగు ఇళ్లు, ఒక వాణిజ్య సముదాయం), 8 ఖాళీ ప్లాట్లు, 10.23 ఎకరాల వ్యవసాయ భూమిని అధికారులు గుర్తించారు. వీటితో పాటు రూ.3.31 లక్షల నగదు, బ్యాంకు ఖాతాల్లో ఉన్న రూ.50 లక్షలు, ఒక గ్రాండ్ విటారా కారు, ఒక టీవీఎస్ స్కూటీని స్వాధీనం చేసుకున్నారు. ఈ ఆస్తుల డాక్యుమెంట్ విలువ సుమారు రూ.3 కోట్లు ఉండగా, బహిరంగ మార్కెట్‌లో వీటి విలువ చాలా రెట్లు అధికంగా ఉంటుందని ఏసీబీ అంచనా వేస్తోంది.

మల్లారెడ్డి భార్య, కుటుంబ సభ్యుల పేర్లపై ఉన్న మూడు బ్యాంక్ లాకర్లను కూడా గుర్తించామని, వాటిని విచారణలో భాగంగా త్వరలోనే తెరుస్తామని అధికారులు తెలిపారు. నిందితుడిని ఏసీబీ కోర్టులో హాజరుపరిచి రిమాండ్‌కు తరలించనున్నారు.

వారం రోజుల క్రితమే ల్యాండ్స్ అండ్ సర్వేస్ శాఖ డిప్యూటీ డైరెక్టర్ సుంకరి నరహరిని కూడా ఏసీబీ ఇలాగే అక్రమాస్తుల కేసులో అరెస్ట్ చేసిన విషయం తెలిసిందే. నరహరి కేసులో సుమారు రూ.13 కోట్లకు పైగా ఆస్తులు, రూ.1.54 కోట్ల నగదు, భారీగా బంగారం వెలుగుచూశాయి. వరుస అరెస్టులతో అవినీతి అధికారుల్లో కలవరం మొదలైంది.