టీ20 క్రికెట్‌లో కొత్త రారాజు.. గేల్ ను అధిగమించిన పొలార్డ్

వెస్టిండీస్ విధ్వంసకర ఆల్‌రౌండర్ కీరన్ పొలార్డ్ టీ20 క్రికెట్‌లో సరికొత్త చరిత్ర సృష్టించాడు. ఈ పొట్టి ఫార్మాట్‌లో అత్యధిక పరుగులు చేసిన ఆటగాడిగా అగ్రస్థానానికి చేరుకున్నాడు. ఇప్పటివరకు ఈ రికార్డును తన పేరిట ఉంచుకున్న సహచర ఆటగాడు క్రిస్ గేల్‌ను పొలార్డ్ అధిగమించాడు. మేజర్ లీగ్ క్రికెట్ (MLC) 2026 సీజన్‌లో భాగంగా ఆదివారం ఈ ఘనత సాధించాడు.

డల్లాస్‌లో వాషింగ్టన్ ఫ్రీడమ్‌తో జరిగిన మ్యాచ్‌లో ఎంఐ న్యూయార్క్ తరఫున ఆడిన పొలార్డ్, అజేయ శతకంతో (100* పరుగులు, 56 బంతుల్లో) చెలరేగాడు. ఈ ఇన్నింగ్స్‌తో అతను టీ20ల్లో తన మొత్తం పరుగుల సంఖ్యను 14,582కు పెంచుకున్నాడు. దీంతో, 14,562 పరుగులతో పదేళ్లకు పైగా (4,463 రోజులు) అగ్రస్థానంలో ఉన్న క్రిస్ గేల్ రికార్డు బద్దలైంది. ఈ మ్యాచ్‌లో తొలుత బ్యాటింగ్ చేసిన వాషింగ్టన్ ఫ్రీడమ్ జట్టు 245 పరుగులు చేయగా, పొలార్డ్ సెంచరీ చేసినప్పటికీ ఎంఐ న్యూయార్క్ 215 పరుగులకే పరిమితమై ఓటమిపాలైంది.

39 ఏళ్ల పొలార్డ్ తన సుదీర్ఘ కెరీర్‌లో 736 టీ20 మ్యాచ్‌లు ఆడి ఈ మైలురాయిని చేరుకున్నాడు. టీ20 క్రికెట్‌లో 10,000కు పైగా పరుగులు, 300కు పైగా వికెట్లు పడగొట్టిన ఏకైక ఆటగాడిగానూ అతనికి అరుదైన రికార్డు ఉంది. ఎక్కువగా ఫినిషర్ పాత్ర పోషించే అతను, నెం.5 లేదా ఆ తర్వాతి స్థానాల్లో బ్యాటింగ్‌కు వచ్చి 10,000కు పైగా పరుగులు చేయడం విశేషం. ఈ వయసులోనూ అత్యున్నత స్థాయిలో రాణిస్తూ పొలార్డ్ తన ప్రత్యేకతను చాటుకుంటున్నాడు.

టీ20 క్రికెట్‌లో పరుగుల వీరులు వీళ్లే..

కీరన్ పొలార్డ్: 14,582 పరుగులు (736 మ్యాచ్‌లు)
క్రిస్ గేల్: 14,562 పరుగులు (463 మ్యాచ్‌లు)
అలెక్స్ హెల్స్: 14,449 పరుగులు (528 మ్యాచ్‌లు)
జాస్ బట్లర్: 14,371 పరుగులు (510 మ్యాచ్‌లు)
డేవిడ్ వార్నర్: 14,284 పరుగులు (439 మ్యాచ్‌లు)
విరాట్ కోహ్లీ: 14,218 పరుగులు (430 మ్యాచ్‌లు)