‘మంచి ఆరోగ్యం, దీర్ఘాయువు కలగాలి’.. రాహుల్‌ గాంధీకి మోదీ శుభాకాంక్షలు

లోక్‌సభ ప్రతిపక్ష నేత రాహుల్‌ గాంధీకి ప్రధాని మోదీ జన్మదిన శుభాకాంక్షలు తెలిపారు. దేవుడు ఆయనకు మంచి ఆరోగ్యం, దీర్ఘాయుష్షు ప్రసాదించాలని ఆకాంక్షించారు.

శుక్రవారం రాహుల్ గాంధీ 56వ పుట్టినరోజు జరుపుకొంటున్నారు. ఈ సందర్భంగా ప్రధాని మోదీ సోషల్ మీడియా ‘ఎక్స్‌’లో ప్రత్యేక సందేశం పోస్టు చేశారు. ‘‘లోక్‌సభ ప్రతిపక్ష నేత రాహుల్ గాంధీకి జన్మదిన శుభాకాంక్షలు. ఆయన మంచి ఆరోగ్యం, దీర్ఘాయుష్షుతో ఉండాలని ప్రార్థిస్తున్నాను’’ అని మోదీ పేర్కొన్నారు. రాజకీయంగా తీవ్ర విభేదాలు ఉన్నప్పటికీ రాహుల్ గాంధీ పుట్టినరోజు సందర్భంగా ప్రధాని మోదీ శుభాకాంక్షలు తెలియజేయడం విశేషం.

1970 జూన్ 19న జన్మించిన రాహుల్ గాంధీ మాజీ ప్రధాని రాజీవ్‌ గాంధీ, మాజీ కాంగ్రెస్ అధ్యక్షురాలు సోనియా గాంధీ దంపతుల కుమారుడు. ప్రస్తుతం ఉత్తరప్రదేశ్‌లోని రాయ్‌బరేలీ నుంచి లోక్‌సభ సభ్యుడిగా ప్రాతినిధ్యం వహిస్తున్నారు. 2004లో అమేథీ నుంచి తొలిసారి లోక్‌సభకు ఎన్నికయ్యారు. తర్వాత కాంగ్రెస్ పార్టీలో కీలక బాధ్యతలు చేపట్టారు. 2013లో పార్టీ ఉపాధ్యక్షుడిగా బాధ్యతలు స్వీకరించారు. 2017లో కాంగ్రెస్ అధ్యక్షుడయ్యారు. 2019 లోక్‌సభ ఎన్నికల తర్వాత ఆ పదవికి రాజీనామా చేశారు. 2024 జూన్ 9న రాహుల్ గాంధీ లోక్‌సభలో ప్రతిపక్ష నేతగా బాధ్యతలు చేపట్టారు.