ఆ పాటలో ఇంకాస్త బాగా చేసి ఉండాల్సింది: తమన్నా

రజినీకాంత్ నటించిన 'జైలర్' చిత్రంలోని 'నువ్వు కావాలయ్యా' పాట ఎంత పెద్ద హిట్టో అందరికీ తెలిసిందే. ఈ పాటలో తన డ్యాన్స్‌తో ప్రేక్షకులను ఉర్రూతలూగించిన నటి తమన్నా, ఆ పాటలో తన పెర్ఫార్మెన్స్ పట్ల తాను సంతృప్తిగా లేనని తాజాగా వెల్లడించారు. ఈ విషయం తెలిసి అభిమానులు ఆశ్చర్యపోతున్నారు.

ప్రముఖ కొరియోగ్రాఫర్, దర్శకురాలు ఫరా ఖాన్ తన యూట్యూబ్ వ్లాగ్ కోసం ముంబైలోని తమన్నా ఇంటికి వెళ్లారు. ఈ సందర్భంగా ఇద్దరూ తమన్నా కెరీర్‌లోని పలు పాటల గురించి మాట్లాడుకున్నారు. ఈ క్రమంలోనే 'కావాలయ్యా' పాట ప్రస్తావన వచ్చింది. అప్పుడు తమన్నా మాట్లాడుతూ, "ఆ పాట షూటింగ్ సమయంలో నా నటనపై నేను కొంచెం అసంతృప్తిగా ఉన్నాను. ఇంకా మెరుగ్గా చేసి ఉండాల్సింది అనిపించింది" అని తెలిపారు.

దీనికి ఫరా ఖాన్ స్పందిస్తూ, "నువ్వు ఎప్పుడూ ఇంకా బాగా చేయొచ్చు అని భావించే రకం" అని అన్నారు. తాను శిక్షణ పొందిన డ్యాన్సర్‌ని కాదని, 'ఆజ్ కీ రాత్' అనే పాట కోసం 15 రోజులు రిహార్సల్స్ చేశానని, అలాంటి సమయం కేటాయించాలని కోరుకుంటానని తమన్నా వివరించారు. అనిరుధ్ రవిచందర్ సంగీతం అందించిన 'కావాలయ్యా' పాటకు శ్రీసాయి కిరణ్ సాహిత్యం అందించారు. సింధుజా శ్రీనివాసన్, అనిరుధ్ రవిచందర్ ఆలపించారు.

ఇక సినిమాల విషయానికొస్తే, తమన్నా ప్రస్తుతం పలు ఆసక్తికర ప్రాజెక్టులతో బిజీగా ఉన్నారు. సిద్ధార్థ్ మల్హోత్రాతో కలిసి 'వ్వాన్ – ఫోర్స్ ఆఫ్ ది ఫారెస్ట్' అనే చిత్రంలో నటిస్తున్నారు. అలాగే, ఆమిర్ ఖాన్ కుమారుడు జునైద్ ఖాన్ హీరోగా నటిస్తున్న 'రాగిణి 3' అనే హారర్ చిత్రంలోనూ ఆమె కీలక పాత్ర పోషిస్తున్నారు. ఏక్తా కపూర్ నిర్మిస్తున్న ఈ సినిమాపై ఇప్పటికే ప్రేక్షకుల్లో భారీ అంచనాలు నెలకొన్నాయి.