భారత్-పాక్ మ్యాచ్‌లో గొడవ జరిగిందా?.. వైర‌ల్ అవుతున్న‌ వీడియో వెనుక అస‌లు నిజం ఇదే!

నిన్న‌ జరిగిన మహిళల టీ20 ప్రపంచకప్‌లో పాకిస్థాన్‌పై భారత జట్టు 64 పరుగుల తేడాతో ఘన విజయం సాధించింది. ఈ అద్భుత విజయాన్ని ఆస్వాదిస్తున్న తరుణంలో సోషల్ మీడియాలో ఓ వీడియో తీవ్ర కలకలం రేపింది. ఇరు జట్ల క్రీడాకారిణుల మధ్య మైదానంలో తీవ్రస్థాయిలో గొడవ జరిగినట్లు ఆ వీడియోలో ఉండటంతో అది క్షణాల్లో వైరల్ అయింది. అయితే, ఈ వీడియో పూర్తిగా నకిలీదని, ఇందులో ఎలాంటి వాస్తవం లేదని తేలింది.

సోషల్ మీడియాలో చక్కర్లు కొడుతున్న ఆ వీడియోలో పిచ్ మధ్యలో ఒక పాకిస్థాన్ క్రీడాకారిణి, భారత బ్యాటర్‌పై దాడికి యత్నిస్తున్నట్లు కనిపిస్తుంది. వెంటనే అంపైర్లు, ఇతర క్రీడాకారిణులు జోక్యం చేసుకుని వారిద్దరినీ విడదీస్తున్నట్లు ఉంది. ఇక‌, ఈ వీడియో చూసిన అభిమానులు తీవ్రంగా స్పందించారు. కొందరు ఇది నిజంగా జరిగిందా? అని ఆశ్చర్యం వ్యక్తం చేయగా, మరికొందరు క్రీడాస్ఫూర్తికి ఇది విరుద్ధమని వ్యాఖ్యానించారు.

వాస్తవానికి బర్మింగ్‌హామ్ వేదికగా జరిగిన మ్యాచ్‌లో ఇలాంటి సంఘటన ఏదీ జరగలేదని స్పష్టమైంది. మ్యాచ్ మొత్తం ప్రశాంత వాతావరణంలో, క్రీడాస్ఫూర్తితోనే సాగింది. ప్రస్తుతం అందుబాటులో ఉన్న కృత్రిమ మేధ (ఏఐ) టెక్నాలజీని ఉపయోగించి ఈ నకిలీ వీడియోను సృష్టించి ఉంటారని నిపుణులు భావిస్తున్నారు. ఆర్టిఫిషియల్ ఇంటెలిజెన్స్ యుగంలో సోషల్ మీడియాలో కనిపించే ప్రతీదాన్నీ నమ్మడం ఎంత ప్రమాదకరమో ఈ సంఘటన మరోసారి రుజువు చేసింది.

ఇక, అసలు మ్యాచ్ విషయానికొస్తే.. భారత జట్టు అన్ని విభాగాల్లోనూ అద్భుత ప్రదర్శన కనబరిచింది. వైస్ కెప్టెన్ స్మృతి మంధాన అద్భుతమైన హాఫ్ సెంచరీతో జట్టుకు గట్టి పునాది వేయగా, చివర్లో రిచా ఘోష్ మెరుపు ఇన్నింగ్స్‌తో స్కోరు బోర్డును పరుగులు పెట్టించింది. బౌలింగ్‌లో ఆల్-రౌండర్ దీప్తి శర్మ ఏకంగా ఐదు వికెట్లు పడగొట్టి పాకిస్థాన్ పతనాన్ని శాసించింది. ఈ విజయంతో భారత మహిళల జట్టు టీ20 ప్రపంచకప్ జ‌ర్నీని ఘనంగా ప్రారంభించింది. ఇలాంటి గొప్ప విజయం తర్వాత తప్పుడు సమాచారంతో కూడిన వీడియోలను ప్రచారం చేయడంపై క్రీడాభిమానులు విచారం వ్యక్తం చేస్తున్నారు.