మిర్చి ఎగుమతిదారుల్లో ఆందోళన... పురుగుమందుల కారణంగా దిగుమతులు నిలిపేసిన చైనా
- గుంటూరు మిర్చి కంటైనర్లను తిరస్కరించిన చైనా
- మిర్చిలో అధిక మోతాదులో పురుగుమందుల అవశేషాలు గుర్తింపు
- ముగ్గురు భారత ఎగుమతిదారులపై దిగుమతి నిషేధం విధింపు
- ఏపీ నుంచి మిర్చి ఎగుమతులపై తీవ్ర ప్రభావం చూపే అవకాశం
దేశంలోనే మిర్చి ఉత్పత్తికి, ఎగుమతులకు గుంటూరు ప్రధాన కేంద్రం. ముఖ్యంగా ఇక్కడి 'తేజ' రకం మిర్చికి చైనా మార్కెట్లో విశేషమైన డిమాండ్ ఉంది. తాజా పరిణామాలతో ఎగుమతిదారులు తీవ్ర ఆందోళనకు గురవుతున్నారు. విక్రయాలు నిలిచిపోయిన నిల్వలను కొందరు కోల్డ్ స్టోరేజీల్లో భద్రపరుస్తున్నారు. రైతులు వినియోగించే 'ఎసిఫేట్' వంటి పురుగుమందుల కారణంగానే మిర్చిలో 'మెథామిడోఫాస్' అవశేషాలు కనిపిస్తున్నాయని నిపుణులు విశ్లేషిస్తున్నారు.
ఈ సమస్యను పరిష్కరించేందుకు స్పైసెస్ బోర్డ్, ఉద్యానవన శాఖ అధికారులు రంగంలోకి దిగారు. ఎగుమతిదారులతో ప్రత్యేక సమావేశాలు నిర్వహిస్తూ నాణ్యతా ప్రమాణాలపై చర్చిస్తున్నారు. వచ్చే సీజన్ ప్రారంభానికి ముందే రాష్ట్ర అధికారులతో కలిసి కఠినమైన నాణ్యత నియంత్రణ చర్యలు చేపట్టాలని యోచిస్తున్నారు. ప్రస్తుతం భారత మిర్చిపై పూర్తిస్థాయి నిషేధం ఏమీ లేనప్పటికీ, సదరు మూడు కంపెనీలపై ఉన్న సస్పెన్షన్ మాత్రం కొనసాగుతోంది.
