నటి సమీరా రెడ్డి చెప్పిన చిట్కా... పనస గింజలతో ఇన్ని లాభాలా?

పనస పండు తిన్న తర్వాత అందులోని గింజలను చాలామంది పారేస్తుంటారు. కానీ, ఆ గింజలలో అద్భుతమైన ఆరోగ్య ప్రయోజనాలు దాగి ఉన్నాయని మీకు తెలుసా? ఈ విషయాన్ని ప్రముఖ నటి సమీరా రెడ్డి తన ఇన్‌స్టాగ్రామ్ పోస్ట్ ద్వారా మరోసారి గుర్తుచేశారు. తన పెరరటిలోని చెట్టు నుంచి వచ్చిన పనస గింజలను తాను కూడా తింటానని ఆమె తెలిపారు. అంతేకాదు, మలయాళ పదం 'చక్కా' నుంచి పోర్చుగీస్ పదం 'జాకా' వచ్చి, ఆ తర్వాత 'జాక్‌ఫ్రూట్' అనే పేరు స్థిరపడిందని ఆమె వివరించారు.

ఆరోగ్య ప్రయోజనాలు ఇవే..

పనస గింజల వల్ల కలిగే ఆరోగ్య ప్రయోజనాలపై నిపుణులు కీలక విషయాలు వెల్లడిస్తున్నారు. డాక్టర్ అమోఘ్ దుధ్వే వాలా ప్రకారం, ఉడికించిన లేదా వేయించిన పనస గింజలను మితంగా తింటే ఎంతో మేలు జరుగుతుంది. వీటిలో ఫైబర్, ప్రొటీన్, ఐరన్, పొటాషియం, యాంటీఆక్సిడెంట్లు పుష్కలంగా లభిస్తాయి. ఇవి జీర్ణవ్యవస్థను మెరుగుపరచి, మలబద్ధకాన్ని తగ్గిస్తాయి. పేగుల్లో మంచి బ్యాక్టీరియాకు ఆహారంగా పనిచేసి, జీవక్రియను మెరుగుపరుస్తాయి. అలాగే, రక్తంలో చక్కెర స్థాయిలను నియంత్రించడంలో, బరువు తగ్గడంలో కూడా సహాయపడతాయని నిపుణులు చెబుతున్నారు.

జాగ్రత్తలు తప్పనిసరి

అయితే, పనస గింజలు తినేటప్పుడు కొన్ని జాగ్రత్తలు తీసుకోవడం చాలా ముఖ్యం. వీటిని ఎప్పుడూ పచ్చిగా తినకూడదు. ఎందుకంటే పచ్చి గింజలలోని కొన్ని సమ్మేళనాలు పోషకాలను శరీరం గ్రహించకుండా అడ్డుకుంటాయి. గింజలను ఉడికించడం, వేయించడం వంటి పద్ధతుల్లో వండుకుని తినడం ఉత్తమం. రక్తస్రావాన్ని తగ్గించే మందులు వాడేవారు, గ్యాస్ లేదా అజీర్తి సమస్యలు ఉన్నవారు వీటిని తినే ముందు వైద్యులను సంప్రదించడం మంచిది. ఏవైనా కొత్త ఆహార పదార్థాలను ప్రయత్నించే ముందు నిపుణుల సలహా తీసుకోవడం ఎల్లప్పుడూ సురక్షితం.