'పెద్ది' తొలిరోజు థియేటర్లకు వచ్చింది వీరు మాత్రమే: దర్శకుడు బుచ్చిబాబు

రామ్ చరణ్ హీరోగా వచ్చిన 'పెద్ది' చిత్రం బాక్సాఫీస్ వద్ద నిలకడగా రాణిస్తోంది. సినిమా టాక్ మెల్లగా పుంజుకోవడంపై దర్శకుడు బుచ్చిబాబు ఆసక్తికర విషయాలను పంచుకున్నారు. సీనియర్ నటుడు జగపతిబాబుతో జరిగిన ఒక సంభాషణలో, ఈ సినిమా మొదటి రోజు నుండే ఎందుకు భారీ వసూళ్లను సాధించలేకపోయిందో, ఇప్పుడు మౌత్ టాక్‌తో ఎలా పుంజుకుంటోందో ఆయన వివరించారు.

బుచ్చిబాబు సనా వివరాల ప్రకారం.. మొదటి రోజు థియేటర్లకు వచ్చిన వారిలో ఎక్కువ శాతం రామ్ చరణ్ అభిమానులు, యాంటీ ఫ్యాన్స్, భారీ అంచనాలతో వచ్చిన ప్రేక్షకులే ఉన్నారు. వారి మైండ్‌సెట్ సాధారణ కుటుంబ ప్రేక్షకుల కంటే భిన్నంగా ఉండటం వల్లే ప్రారంభంలో మిశ్రమ స్పందన వచ్చింది. 

"ఇది ఒక వ్యక్తి వచ్చి 50 మందిని చితక్కొట్టే రొటీన్ కమర్షియల్ సినిమా కాదు. ప్రతి ఐదు నిమిషాలకూ ఈలలు, చప్పట్లు కొట్టేలా ఉండదు. 'పెద్ది' అనేది గుండెలను హత్తుకునే ఒక ఎమోషనల్ ఫిల్మ్. ఆ బలమైన భావోద్వేగం ప్రేక్షకుల మనసుల్లోకి వెళ్లడానికి సమయం పడుతుంది. ప్రీమియర్ షోలు పడినప్పటికీ, అసలైన పాజిటివ్ టాక్ బయటకు రావడానికి కనీసం రెండు రోజులు పట్టింది" అని బుచ్చిబాబు వివరించారు.

ఈ చిత్రం శుక్రవారం నుండి మంచి పికప్ సాధించిందని ఆయన తెలిపారు. రోజులు గడిచేకొద్దీ రివ్యూలు, పబ్లిక్ టాక్ పూర్తిగా అనుకూలంగా మారడంతో కుటుంబ ప్రేక్షకులు భారీగా థియేటర్లకు తరలివస్తున్నారని, ఇది సినిమా దీర్ఘకాలిక విజయానికి ఎంతో కీలకం కానుందని మేకర్స్ నమ్ముతున్నారు. సోషల్ మీడియాలో కొందరు ఉద్దేశపూర్వకంగా నెగిటివ్ ప్రచారం చేస్తున్నప్పటికీ, ఫ్యామిలీ ఆడియన్స్ ఆదరణే దీనికి అసలైన సమాధానమని చిత్రబృందం ధీమా వ్యక్తం చేస్తోంది.