స్పేస్‌ఎక్స్ ఐపీఓ సంచలనం.. రాత్రికిరాత్రే కోటీశ్వరులుగా మార‌నున్న 4400 మంది ఉద్యోగులు!

ప్రముఖ అంతరిక్ష పరిశోధన సంస్థ స్పేస్‌ఎక్స్ త్వరలో పబ్లిక్ ఇష్యూకు (ఐపీఓ) రాబోతోంది. ఈ ఐపీఓ విజయవంతమైతే, ఆ సంస్థలో పనిచేస్తున్న వేలాది మంది ఉద్యోగులు రాత్రికిరాత్రే కోటీశ్వరులు కావడం ఖాయంగా కనిపిస్తోంది. ఈ పరిణామం కార్పొరేట్ ప్రపంచంలో సంచలనంగా మారింది. స్టాక్ మార్కెట్ చరిత్రలోనే ఇది అతిపెద్ద ఐపీఓగా నిలిచిపోయే అవకాశాలున్నాయని నిపుణులు అంచనా వేస్తున్నారు.

కంపెనీ ఒక్కో షేరు ధరను 135 డాలర్లుగా నిర్ణయించే అవకాశం ఉంది. ఈ ధర వద్ద కంపెనీ మొత్తం మార్కెట్ విలువ 1.77 ట్రిలియన్ డాలర్లకు చేరుకుంటుంది. ఈ లెక్కన, సంస్థలోని ప్రస్తుత, మాజీ ఉద్యోగుల్లో సుమారు 4,400 మంది తమ స్టాక్ హోల్డింగ్స్ ద్వారా మిలియనీర్లు (1 మిలియన్ డాలర్లకు పైగా సంపద) అవుతారని 'న్యూయార్క్ టైమ్స్' నివేదిక వెల్లడించింది. వీరిలో దాదాపు 400 మంది ఉద్యోగుల సంపద 100 మిలియన్ డాలర్ల కంటే ఎక్కువగా ఉంటుందని అంచనా.

సాధారణంగా ఐపీఓలలో కంపెనీ వ్యవస్థాపకులు, కొద్దిమంది ఉన్నతస్థాయి అధికారులు మాత్రమే అత్యధికంగా లాభపడతారని, కానీ స్పేస్‌ఎక్స్ విషయంలో ఇది భిన్నంగా ఉందని హిల్.కామ్ సీఈఓ ఆండ్రూ బెన్సన్ అన్నారు. "ఒకే కంపెనీలో 400 మందికి పైగా 100 మిలియన్ డాలర్ల సంపదను కలిగి ఉండటం చాలా అరుదైన విషయం. స్పేస్‌ఎక్స్ ఎంత భారీ సంపదను సృష్టించిందో ఇది తెలియజేస్తుంది" అని ఆయన వివరించారు.

2011లో స్పేస్‌ఎక్స్‌లో చేరిన ట్రెవర్ హైస్ అనే ఉద్యోగి కథే ఇందుకు నిదర్శనం. అప్పుడు కంపెనీ చాలా చిన్నది. ఆయనకు పరిహారంలో భాగంగా 1,00,000 షేర్లను ఇచ్చారు. ఐపీఓ ధర 135 డాలర్లుగా ఉంటే, ఆయన షేర్ల విలువ ఏకంగా 13.5 మిలియన్ డాలర్లకు (సుమారు రూ. 129 కోట్లు) చేరుకుంటుంది. "స్పేస్‌ఎక్స్ ఉద్యోగులకు నగదు కంటే ఎక్కువగా ఈక్విటీ (షేర్లు) రూపంలో పరిహారం ఇచ్చింది. ఐపీఓ తర్వాత ఈ సంపదంతా ఒక్కసారిగా రియల్ ఎస్టేట్ మార్కెట్లోకి ప్రవహించే అవకాశం ఉంది" అని రియల్ ఎస్టేట్ సంస్థ రీల్టర్.కామ్ సీనియర్ ఆర్థికవేత్త హన్నా జోన్స్ తెలిపారు.

ఈ ఐపీఓలో మరో ప్రత్యేకత చిన్న ఇన్వెస్టర్లకు పెద్ద పీట వేయడం. సాధారణంగా బడా ఐపీఓలలో రిటైల్ ఇన్వెస్టర్లకు 5 నుంచి 10 శాతం షేర్లు మాత్రమే కేటాయిస్తారు. కానీ స్పేస్‌ఎక్స్ ఐపీఓలో ఏకంగా 30 శాతం షేర్లను రిటైల్ ఇన్వెస్టర్ల కోసం రిజర్వ్ చేసే అవకాశం ఉంది. అంతేకాకుండా, ఫిడిలిటీ వంటి సంస్థల ద్వారా కేవలం 2,000 డాలర్ల పెట్టుబడితో కూడా ఈ ఐపీఓలో పాల్గొనే అర్హత కల్పించడం విశేషం.

ఈ ఐపీఓ ద్వారా స్పేస్‌ఎక్స్ వ్యవస్థాపకుడు ఎలాన్ మస్క్ సంపద భారీగా పెరగనుంది. కంపెనీలో ఆయనకు 42% వాటా ఉంది. ఐపీఓ తర్వాత కంపెనీ విలువ 1.77 ట్రిలియన్ డాలర్లకు చేరితే, ఒక్క మస్క్ వాటా విలువే 740 బిలియన్ డాలర్లుగా ఉంటుంది. గతేడాది 800 బిలియన్ డాలర్లుగా ఉన్న స్పేస్‌ఎక్స్ విలువ, ఫిబ్రవరిలో మస్క్‌కు చెందిన ఆర్టిఫిషియల్ ఇంటెలిజెన్స్ కంపెనీ 'xAI' విలీనం తర్వాత 1.25 ట్రిలియన్ డాలర్లకు పెరిగింది. ఈ ఐపీఓ ద్వారా కంపెనీ 75 బిలియన్ డాలర్ల వరకు నిధులను సమీకరించాలని లక్ష్యంగా పెట్టుకుంది. ఇది నిజమైతే, స్టాక్ మార్కెట్ చరిత్రలోనే ఇది అతిపెద్ద ఐపీఓగా రికార్డు సృష్టిస్తుంది.