18 రోజుల ప్రేమ.. ఐదేళ్ల నరకం.. ఆమిర్ ఖాన్ తమ్ముడితో విడాకులపై నటి ఎవా గ్రోవర్ సంచలన వ్యాఖ్యలు!
- ఆమిర్ ఖాన్ సోదరుడితో వివాహం, విడాకులపై నటి ఎవా గ్రోవర్ వెల్లడి
- 18 రోజుల ప్రేమతో, తల్లిని ఎదిరించి పెళ్లి చేసుకున్నానన్న నటి
- పెళ్లయ్యాక భర్త నుంచి తీవ్ర గృహ హింస ఎదుర్కొన్నానని ఆరోపణ
- పాప పుట్టిన నెలకే వేధింపులు తట్టుకోలేక ఇంటి నుంచి వచ్చేసిన వైనం
- కష్టకాలంలో ఆమిర్ ఖాన్ తండ్రి, అత్తగారు అండగా నిలిచారని వెల్లడి
తన తల్లి వద్దని వారించినా వినకుండా, కేవలం 18 రోజుల ప్రేమ తర్వాత హైదర్ అలీ ఖాన్ను పెళ్లి చేసుకున్నట్లు ఎవా తెలిపారు. అంత తక్కువ సమయంలో ఒక వ్యక్తిని అంచనా వేయడంలో పొరపాటు చేశానని అన్నారు. ఈ పెళ్లి విషయంలో ఆమిర్ ఖాన్ కూడా తనను ముందుగానే హెచ్చరించారని, అయినా తాను తొందరపాటు నిర్ణయం తీసుకున్నానని ఆమె గుర్తుచేసుకున్నారు.
పెళ్లయిన కొన్ని రోజులకే భర్త అసలు స్వరూపం బయటపడిందని, ఆయన తరచూ తనపై శారీరకంగా దాడి చేసేవాడని ఎవా కన్నీటిపర్యంతమయ్యారు. బంధం నిలబడుతుందనే ఆశతో పాపకు జన్మనిచ్చానని, కానీ బిడ్డ పుట్టిన నెలకే వేధింపులు ఎక్కువ కావడంతో, పసిపాపతో ఇంటి నుంచి బయటకు వచ్చేసినట్లు ఆమె వివరించారు.
ఈ కష్ట సమయంలో తన తోటి నటీనటులు, సీరియల్ యూనిట్ సభ్యులు తనకు అండగా నిలిచారని ఆమె చెప్పారు. ఆమిర్ ఖాన్ తండ్రి, దివంగత నిర్మాత తాహిర్ హుస్సేన్, అత్తగారు షహనాజ్ తనకు ఎంతో మద్దతు ఇచ్చారని గుర్తుచేసుకున్నారు. ఐదేళ్ల నరకయాతన తర్వాత హైదర్తో విడాకులు తీసుకున్నట్లు ఎవా గ్రోవర్ తెలిపారు. తొందరపాటు నిర్ణయాలు జీవితాలను నాశనం చేస్తాయని చెప్పడానికి తన అనుభవమే నిదర్శనమని ఆమె పేర్కొన్నారు.
