అనర్హుల ఏరివేతకే వెరిఫికేషన్.. గ్యారెంటీలపై డీకే శివకుమార్ స్పష్టీకరణ

కర్ణాటకలో ప్రభుత్వం అమలు చేస్తున్న గ్యారెంటీ పథకాల లబ్ధిదారుల సంఖ్యను తగ్గించే ఉద్దేశం లేదని ముఖ్యమంత్రి డీకే శివకుమార్ స్పష్టం చేశారు. అర్హులైన వారికే ప్రయోజనాలు అందేలా చూడటమే లక్ష్యంగా వెరిఫికేషన్ ప్రక్రియ చేపడుతున్నామని, కోత విధించడం తమ ప్రభుత్వ ఉద్దేశం కాదని తేల్చిచెప్పారు.

కొన్నిచోట్ల గృహలక్ష్మి పథకం కింద చనిపోయిన లబ్ధిదారుల పేరుతో కూడా డబ్బు డ్రా అవుతున్నట్లు తమ దృష్టికి వచ్చిందని శివకుమార్ తెలిపారు. ఆ ఖాతాలకు వేరే మొబైల్ నంబర్లను లింక్ చేసి మోసాలకు పాల్పడుతున్నారని చెప్పారు. అలాగే, గృహజ్యోతి పథకం కింద కొందరు ఉచిత విద్యుత్‌ను ఇళ్లకు కాకుండా దుకాణాల వంటి వాణిజ్య అవసరాలకు వాడుకుంటున్నారని పేర్కొన్నారు. ఒకే వ్యక్తి పేరు మీద ఆరు విద్యుత్ మీటర్లు ఉన్నాయని, ఇలాంటి అనర్హుల ఏరివేతకే తనిఖీలు నిర్వహిస్తున్నామని వివరించారు.

నీతి ఆయోగ్ సమావేశంలో పాల్గొనేందుకు ఢిల్లీకి వచ్చినట్లు శివకుమార్ తెలిపారు. ఈ సందర్భంగా ప్రధాని నరేంద్ర మోదీ, పలువురు కేంద్ర మంత్రులతో భేటీ అయ్యేందుకు సమయం కోరానని, ప్రధాని గురువారం అపాయింట్‌మెంట్ ఇచ్చారని వెల్లడించారు. ఇప్పటికే కేంద్ర పట్టణాభివృద్ధి శాఖ మంత్రి మనోహర్ లాల్ ఖట్టర్‌తో సమావేశమై రాష్ట్రంలోని మెట్రో డబుల్ డెక్కర్ ప్రాజెక్టుకు అనుమతులు ఇవ్వాలని కోరినట్లు చెప్పారు.

ప్రస్తుతానికి రాష్ట్ర మంత్రివర్గ విస్తరణపై ఎలాంటి చర్చ లేదని ఆయన స్పష్టం చేశారు. కాగా, మధ్యప్రదేశ్‌లో కాంగ్రెస్ నేత మీనాక్షి నటరాజన్ రాజ్యసభ నామినేషన్‌ను తిరస్కరించడంపై ఆయన తీవ్రంగా స్పందించారు. ఇది ప్రజాస్వామ్య వ్యవస్థను తలదించుకునేలా చేసే రాజకీయ కుట్ర అని ఆరోపించారు.