జస్టిన్ ట్రూడోతో పీకల్లోతు ప్రేమలో ఉన్నాను: కేటీ పెర్రీ ప్రకటన

ప్రముఖ అమెరికన్ పాప్ సింగర్ కేటీ పెర్రీ తన వ్యక్తిగత జీవితం గురించి ఆసక్తికర విషయాలు వెల్లడించారు. కెనడా మాజీ ప్రధాని జస్టిన్ ట్రూడోతో తాను ప్రేమలో ఉన్నానని, ఆయనే తన జీవితానికి సర్వస్వం అని ఆమె ప్రకటించారు. ఇటీవల న్యూయార్క్ నగరంలో జరిగిన ‘కేటీ పెర్రీ: ది లైఫ్‌టైమ్స్ టూర్’ కాన్సర్ట్ ఫిల్మ్ ప్రీమియర్‌కు ఆమె జస్టిన్ ట్రూడోతో కలిసి హాజరయ్యారు. ఈ సందర్భంగా తొలిసారిగా ఇద్దరూ జంటగా రెడ్ కార్పెట్‌పై నడిచారు.

ఈ కార్యక్రమంలో కేటీ పెర్రీ మాట్లాడుతూ, "నేను గాఢమైన ప్రేమలో ఉన్నాను. నా జీవితానికి సర్వస్వం అయిన వ్యక్తిని కలిసిన తర్వాతే ఈ షో చేశాను. ఆయన నా జీవితానికి ఒక లంగరులా నిలిచారు. నేను ఒక రంగుల గాలిపటం లాంటి దాన్ని, ఎంతో ఎత్తుకు ఎగురుతాను. అలాంటి నాకు ఒక ఆధారం అవసరం. ఇప్పుడు ఆ ఆధారం దొరకడంతో నా జీవితం పరిపూర్ణంగా అనిపిస్తోంది," అని సంతోషం వ్యక్తం చేశారు. తన జీవితం ఇప్పుడు ఎంతో సంతోషంగా ఉందని ఆమె తెలిపారు.

కేటీ పెర్రీకి గతంలో నటుడు రస్సెల్ బ్రాండ్‌తో వివాహం కాగా, విడాకులు తీసుకున్నారు. ఆ తర్వాత నటుడు ఓర్లాండో బ్లూమ్‌తో నిశ్చితార్థం జరిగి, ఐదేళ్ల కుమార్తె డైసీ జన్మించింది. అయితే, 2025లో బ్లూమ్‌తో నిశ్చితార్థం రద్దు కావడం తన జీవితంలో అత్యంత కష్టమైన సమయాల్లో ఒకటని ఆమె గుర్తుచేసుకున్నారు. "ఆ కష్టాల నుంచి బయటపడ్డాను. అభిమానులకు, నా కుమార్తెకు, నాకు నేను ఇచ్చిన మాట కోసం నిలబడ్డాను. ప్రతి ఒక్కరూ తమ జీవితంలో అగ్నిపరీక్షను ఎదుర్కోవాల్సిందే," అని కేటీ పెర్రీ అన్నారు. ప్రస్తుతం తన 40 ఏళ్ల వయసులో జీవితాన్ని కొత్త కోణంలో చూస్తున్నానని, మరింత పరిణతి చెందిన వ్యక్తిగా మారానని ఆమె పేర్కొన్నారు.

గత కొన్నాళ్లుగా ట్రూడో, పెర్రీల ప్రేమాయణం వార్తలు వస్తూనే ఉన్నాయి. వీళ్లిద్దరూ జంటగా అనేక ఈవెంట్లలో కనిపించడంతో ఊహాగానాలకు బలం చేకూరింది. తాజాగా, పెర్రీ చేసిన ప్రకటనతో వీరి ప్రేమ కన్ఫామ్ అయింది.