'సంబరాల ఏటి గట్టు' లేటెస్ట్ అప్డేట్.. కీలకపాత్రలో బాలీవుడ్ ప్రముఖుడు!

మెగా హీరో సాయి దుర్గా తేజ్ కథానాయకుడిగా నటిస్తున్న పాన్ ఇండియా చిత్రం 'సంబరాల ఏటి గట్టు'. రోహిత్ కేపీ దర్శకత్వంలో తెరకెక్కుతున్న ఈ సినిమా మరో కీలక షెడ్యూల్‌ను విజయవంతంగా పూర్తి చేసుకుంది. ముంబైలో నిర్వహించిన ఈ తాజా చిత్రీకరణ పూర్తయినట్లు చిత్ర యూనిట్ వర్గాలు వెల్లడించాయి. ఈ షెడ్యూల్‌లో ఒక ప్రముఖ బాలీవుడ్ నటుడు కీలకపాత్రలో నటించినట్లు సమాచారం. అయితే, ఆ నటుడి వివరాలను చిత్రబృందం ప్రస్తుతానికి గోప్యంగా ఉంచింది. ఈ కలయిక సినిమాకు జాతీయస్థాయిలో మరింత ఆదరణ కల్పిస్తుందని విశేలేషకులు భావిస్తున్నారు.

బ్లాక్‌బస్టర్ చిత్రం ‘హనుమాన్’ను నిర్మించిన ప్రైమ్‌షో ఎంటర్‌టైన్‌మెంట్ పతాకంపై కె. నిరంజన్ రెడ్డి, చైతన్య రెడ్డి అత్యంత ప్రతిష్ఠాత్మకంగా ఈ సినిమాను నిర్మిస్తున్నారు. సుమారు రూ. 125 కోట్ల భారీ బడ్జెట్‌తో ఒక గ్రాండ్ యాక్షన్ డ్రామాగా దీనిని రూపొందిస్తున్నారు. ఇప్పటికే విడుదలైన పోస్టర్లలో సాయి దుర్గా తేజ్ మేకోవర్ ప్రేక్షకులను విశేషంగా ఆకట్టుకుంది. ఈ సినిమాలో ‘బాలి’ అనే శక్తివంతమైన పాత్రలో ఆయన తన విశ్వరూపాన్ని ప్రదర్శించనున్నారు.

ఈ చిత్రంలో ఐశ్వర్య లక్ష్మి కథానాయికగా నటిస్తుండగా, జగపతి బాబు, శ్రీకాంత్, సాయికుమార్, అనన్య నాగళ్ల, రవికృష్ణ వంటి ప్రముఖు నటీనటులు ఇతర కీలక పాత్రలు పోషిస్తున్నారు. పీటర్ హెయిన్ పర్యవేక్షణలో రూపొందుతున్న స్టంట్స్, అజనీష్ లోక్‌నాథ్ సంగీతం ఈ సినిమాకు ప్రధాన ఆకర్షణగా నిలవనున్నాయి. తెలుగుతో పాటు హిందీ, తమిళ, కన్నడ, మలయాళ భాషల్లో భారీ స్థాయిలో విడుదల కానున్న ఈ ప్రాజెక్టు కోసం సాయి దుర్గా తేజ్ దాదాపు రెండేళ్లుగా శ్రమిస్తున్నారు. ప్రస్తుతం పోస్ట్ ప్రొడక్షన్ పనులు శరవేగంగా జరుగుతుండగా, త్వరలోనే విడుదల తేదీపై చిత్రబృందం స్పష్టత ఇవ్వనుంది.