మావటీ.. నాకు మసాజ్ చేయవా?: గజరాజు క్యూట్ వీడియో వైరల్!

టన్నుల కొద్దీ బరువున్న ఏనుగులు భారీ శరీరంతో ఉన్నప్పటికీ, కొన్నిసార్లు వాటి ప్రవర్తన చిన్నపిల్లలను తలపిస్తుంది. సరిగ్గా ఇలాంటి ఓ సంఘటనే ఇప్పుడు సోషల్ మీడియాను షేక్ చేస్తోంది. తమిళనాడుకు చెందిన ఓ ఆలయ ఏనుగు, తన మావటిని ఫుట్ మసాజ్ చేయమంటూ ముద్దుగా అడుగుతున్నట్టుగా ఉన్న వీడియో నెటిజన్ల మనసులను దోచుకుంటోంది. చూసేవారికి నవ్వు తెప్పిస్తూనే, ఆ జీవి పట్ల ప్రేమను కలిగిస్తోంది.

తమిళనాడులోని కుంభకోణంలో ప్రసిద్ధి చెందిన అరుల్మిగు ఆది కుంభేశ్వరర్ ఆలయంలో 'మంగళం' అనే ఏనుగు ఉంది. ఇటీవల @lifewshroots అనే ఇన్‌స్టాగ్రామ్ ఖాతాలో షేర్ చేసిన ఒక వీడియోలో మంగళం, దాని మావటి మధ్య ఉన్న అపురూప అనుబంధం కళ్లకు కట్టింది. ఆలయ ప్రాంగణంలో ప్రశాంతంగా నిల్చుని ఉన్న మంగళం నుదుట సంప్రదాయబద్ధంగా తిలకం, మెడలో చిన్న గంటల హారం ఉన్నాయి. దాని మావటి ఎంతో ప్రేమగా దాని కాలుకు మసాజ్ చేస్తుండటం వీడియోలో కనిపిస్తుంది.

అక్కడితో ఆగకుండా, మసాజ్‌ను పూర్తిగా ఆస్వాదిస్తున్న మంగళం, రెండో కాలును కూడా మసాజ్ చేయాలన్నట్టుగా నెమ్మదిగా దాన్ని పైకెత్తి మావటి వైపు చాపింది. తనకు కూడా సమానమైన సేవ చేయాలంటూ మర్యాదగా అడుగుతున్నట్టు ఉన్న ఈ దృశ్యం అందరినీ ఆకట్టుకుంది. "శరీరం పెద్దదే అయినా, మనసు పసిపిల్లది - ఇదే మంగళం" అనే క్యాప్షన్‌తో ఈ వీడియోను పోస్ట్ చేశారు.

ఈ క్యూట్ వీడియో ఇన్‌స్టాగ్రామ్‌లో పోస్ట్ చేసిన కొద్ది సమయంలోనే వైరల్‌గా మారి, 15 లక్షలకు పైగా వ్యూస్ సాధించింది. మంగళం ప్రవర్తన చూసి నెటిజన్లు ముగ్ధులవుతున్నారు. "నేను చూసిన అత్యంత అందమైన వీడియోలలో ఇది ఒకటి" అని ఒకరు కామెంట్ చేయగా, "సాక్షాత్తూ వినాయకుడికి సేవ చేసే భాగ్యం ఆ మావటికి దక్కింది" అని మరొకరు పేర్కొన్నారు. గారాబం కోసం అడిగే చిన్నపిల్లలా మంగళం ఉందని చాలామంది ప్రశంసల వర్షం కురిపిస్తున్నారు. మొత్తానికి, ఈ వీడియో మంగళం, దాని మావటి మధ్య ఉన్న నమ్మకం, స్నేహానికి నిదర్శనంగా నిలిచింది.