'ఈపీఎఫ్'తో రూ.7 లక్షలు... చాలామందికి తెలియని విషయం ఇదే!

ఉద్యోగ భవిష్య నిధి (ఈపీఎఫ్) ఖాతా ఉన్న ప్రతి వేతన ఉద్యోగికి రూ.7 లక్షల వరకు ఉచిత జీవిత బీమా సౌకర్యం అందుబాటులో ఉంటుందని ఉద్యోగ భవిష్య నిధి సంస్థ (ఈపీఎఫ్ఓ) మరోసారి స్పష్టం చేసింది. ఉద్యోగుల డిపాజిట్ లింక్డ్ ఇన్సూరెన్స్ (ఈడీఎల్ఐ) పథకం కింద ఈ ప్రయోజనం లభిస్తుంది. దీని కోసం ఉద్యోగులు అదనంగా ఒక్క రూపాయి కూడా ప్రీమియంగా చెల్లించాల్సిన అవసరం లేదని సంస్థ తెలిపింది.

ఈపీఎఫ్ సభ్యులుగా ఉన్న ఉద్యోగులందరికీ ఈ పథకం వర్తిస్తుంది. ఉద్యోగి సర్వీసులో ఉండగా మరణిస్తే, వారి నామినీకి లేదా చట్టపరమైన వారసులకు ఈ బీమా మొత్తం ఏకమొత్తంలో చెల్లిస్తారు. ఈ పథకానికి సంబంధించిన ప్రీమియంను యాజమాన్యమే (ఉద్యోగి బేసిక్ జీతం, డీఏలో 0.5%) భరిస్తుంది. కనీస బీమా ప్రయోజనం రూ.2.5 లక్షలు కాగా, గరిష్ఠంగా రూ.7 లక్షల వరకు ఉంటుంది.

బీమా క్లెయిమ్ ప్రక్రియ సులభంగా, వేగంగా జరగాలంటే ఈపీఎఫ్ సభ్యులు తమ నామినీ వివరాలను మెంబర్ పోర్టల్‌లో తప్పనిసరిగా అప్‌డేట్ చేసుకోవాలని ఈపీఎఫ్ఓ సూచిస్తోంది. వివాహం, పిల్లలు పుట్టడం వంటి ముఖ్యమైన సందర్భాల్లో నామినీ వివరాలను మార్చుకోవడం మంచిదని నిపుణులు సలహా ఇస్తున్నారు. అవసరమైన పత్రాలు సమర్పించిన 20-30 రోజుల్లో క్లెయిమ్ సెటిల్ అవుతుంది.

ఉద్యోగి చేరిన ఏడాదిలోపే మరణిస్తే కనీసం రూ.50,000 హామీ ఉంటుంది. ఒక ఉద్యోగం నుంచి మరో ఉద్యోగానికి మారినప్పుడు కూడా ఈపీఎఫ్ ఖాతా యాక్టివ్‌గా ఉంటే బీమా కవరేజీ కొనసాగుతుంది. క్లెయిమ్ కోసం నామినీ లేదా సంరక్షకులు ఫారం 5 IF తో పాటు, మరణ ధ్రువీకరణ పత్రం, బ్యాంకు వివరాలు సమర్పించాల్సి ఉంటుంది. పదవీ విరమణ పొదుపుతో పాటు వచ్చే ఈ అదనపు ప్రయోజనాలపై సభ్యులకు అవగాహన కల్పించేందుకు ఈపీఎఫ్ఓ ఈ ప్రచారాన్ని చేపట్టింది.