బిర్యానీలో చచ్చిన పురుగు.. 10 ప్లేట్ల బిర్యానీ ఫ్రీగా ఇవ్వాలని కమిషన్ ఆదేశం!

కస్టమర్‌కు వడ్డించిన బిర్యానీలో చచ్చిన పురుగు కనిపించడంతో, పుదుచ్చేరిలోని ఒక రెస్టారెంట్‌కు జిల్లా వినియోగదారుల కమిషన్ వినూత్న తీర్పునిచ్చింది. బాధితుడికి నష్టపరిహారంతో పాటు, 10 ప్లేట్ల హైదరాబాదీ చికెన్ బిర్యానీని ఉచితంగా అందించాలని ఆదేశించింది. ఈ తీర్పు వినియోగదారుల హక్కుల ప్రాధాన్యతను మరోసారి చాటిచెప్పింది.

2025 డిసెంబర్ 8న పి. సుందరకుమార మణికందన్ అనే వ్యక్తి తన స్నేహితుడితో కలిసి పుదుచ్చేరిలోని 'బ్రియాణి & కో' రెస్టారెంట్‌కు వెళ్లారు. వారు ఆర్డర్ చేసిన చికెన్ బిర్యానీలో చనిపోయిన పురుగు రావడంతో దిగ్భ్రాంతికి గురయ్యారు. వెంటనే దానిని ఫోటోలు, వీడియోల రూపంలో ఆధారాలుగా సేకరించారు. కల్తీ ఆహారం వల్ల తనకు మానసిక క్షోభ కలిగిందని, ఆరోగ్య సమస్యలు తలెత్తుతాయేమోనని భయపడ్డానని మణికందన్ ఆవేదన వ్యక్తం చేశారు. తొలుత రెస్టారెంట్‌ యాజమాన్యానికి లీగల్ నోటీసు పంపినప్పటికీ సరైన స్పందన రాకపోవడంతో, ఆయన వినియోగదారుల కమిషన్‌ను ఆశ్రయించారు.

ఈ కేసును విచారించిన కమిషన్, అపరిశుభ్రమైన ఆహారాన్ని వడ్డించడం 'సేవా లోపం' కిందకు వస్తుందని స్పష్టం చేసింది. మణికందన్ సమర్పించిన వీడియో ఆధారంగా బిర్యానీలో చచ్చిన పురుగు ఉన్నట్లు నిర్ధారించింది. విచారణకు రెస్టారెంట్ యాజమాన్యం హాజరుకాకపోవడంతో కమిషన్ ఏకపక్షంగా తీర్పు వెలువరించింది.

బాధితుడికి కలిగిన మానసిక క్షోభకు రూ. 10,000, కోర్టు ఖర్చుల నిమిత్తం మరో రూ. 3,000 చెల్లించాలని రెస్టారెంట్‌ను కమిషన్ ఆదేశించింది. అంతేకాకుండా, రాబోయే ఐదు వారాల పాటు ప్రతి ఆదివారం రెండు ప్లేట్ల చొప్పున మొత్తం 10 ప్లేట్ల చికెన్ బిర్యానీని నాణ్యతా ప్రమాణాలతో ఉచితంగా అందించాలని తన తీర్పులో స్పష్టం చేసింది.