ఏఐ వాడకం ఓ పోర్న్ వ్యసనం: పలంటిర్ సీఈఓ సంచలన వ్యాఖ్యలు

ప్రముఖ టెక్నాలజీ సంస్థ 'పలంటిర్' సీఈఓ అలెక్స్ కార్ప్ చేసిన వ్యాఖ్యలు ప్రస్తుతం కృత్రిమ మేధ (ఏఐ) రంగంలో తీవ్ర చర్చకు దారితీశాయి. కార్యాలయాల్లో కొందరు ఉద్యోగులు ఉత్పాదకతను విస్మరించి, కేవలం ఏఐ టోకెన్లను అధికంగా వినియోగించడాన్ని ఆయన 'పోర్న్ వ్యసనం'తో పోల్చారు. ఎక్కువ టోకెన్లు వాడినంత మాత్రాన వ్యాపారాలకు మెరుగైన ప్రయోజనం చేకూరుతుందని భావించడం సరికాదని ఆయన స్పష్టం చేశారు.

'పలంటిర్' నిర్వహించిన 'ఏఐపీకాన్ 10' కార్యక్రమంలో భాగంగా టీబీపీఎన్ పాడ్‌కాస్ట్‌కు ఇచ్చిన ఇంటర్వ్యూలో కార్ప్ ఈ వ్యాఖ్యలు చేశారు. "కొందరు రోజంతా ఎటువంటి ఉత్పాదకత లేకుండా ఏఐతోనే సమయం గడుపుతున్నారు. ఇది ఒక రకమైన పోర్న్ వ్యసనం వంటిది. ఇలాంటి అనవసరపు అలవాట్లను నియంత్రించేందుకు మా సంస్థలో అంతర్గతంగా ఒక ప్రత్యేక సాంకేతిక పరికరాన్ని కూడా ఉపయోగిస్తున్నాం" అని ఆయన పేర్కొన్నారు.

ప్రస్తుతం ఏఐ రంగంలో కంపెనీలు చేస్తున్న భారీ పెట్టుబడులకు, వస్తున్న ఫలితాలకు మధ్య గణనీయమైన వ్యత్యాసం ఉందనే విషయాన్ని కార్ప్ వ్యాఖ్యలు స్పష్టం చేస్తున్నాయి. మొదట్లో ఏఐ వినియోగానికి కొలమానంగా భావించిన ప్రాంప్ట్‌లు, టోకెన్ల సంఖ్య ఇప్పుడు కంపెనీలకు ఆర్థిక భారంగా మారుతోందని, వ్యయం పెరుగుతున్నప్పటికీ ఆశించిన స్థాయిలో లాభాలు రావడం లేదని పలు సంస్థలు గుర్తిస్తున్నాయి.

చైనా జీడీపీ వృద్ధిపై నివేదికలు రూపొందించడం వంటి సాధారణ విధులను ఏఐ సమర్థంగా నిర్వర్తిస్తుందని, అయితే సప్లై చైన్, మాన్యుఫ్యాక్చరింగ్, సైనిక కార్యకలాపాలు వంటి సంక్లిష్ట రంగాల్లో మానవ నైపుణ్యం, సమన్వయం తప్పనిసరి అని కార్ప్ వివరించారు. "లార్జ్ లాంగ్వేజ్ మోడల్స్ ఈ పనులను మెరుగుపరుస్తాయి తప్ప, మానవ మేధస్సును పూర్తిగా భర్తీ చేయలేవు" అని ఆయన తేల్చిచెప్పారు.