వామ్మో, కుక్క సైజులో తేలు... ఇప్పుడు కాదులెండి!
- 415 మిలియన్ ఏళ్ల కిందట నివసించిన భారీ తేలును గుర్తించిన శాస్త్రవేత్తలు
- ఇది కుక్క సైజులో మీటరు పొడవుతో ఉండేదని పరిశోధకుల వెల్లడి
- 150 ఏళ్లుగా మ్యూజియంలో దీన్ని మరో జీవి శిలాజంగా పొరబడిన శాస్త్రవేత్తలు
ఆశ్చర్యకరమైన విషయం ఏంటంటే, ఈ తేలుకు సంబంధించిన శిలాజాలను 19వ శతాబ్దంలోనే కనుగొన్నారు. అయితే, శిలాజాలు అసంపూర్ణంగా ఉండటంతో వాటిని ఓ భారీ సముద్ర జీవిగా పొరబడ్డారు. దాదాపు 150 ఏళ్లకు పైగా లండన్లోని నేచురల్ హిస్టరీ మ్యూజియం వంటి సంస్థల్లో ఈ శిలాజాలు మరో జీవి పేరుతోనే ఉండిపోయాయి. ఇటీవల పేలెంటియాలజిస్టులు ఆధునిక సాంకేతికతతో వీటిని తిరిగి పరిశీలించగా, అది తేలు అని నిర్ధారణ అయింది.
ఈ భారీ తేలు 16 సెంటీమీటర్లకు పైగా పొడవున్న బలమైన కొండితో ఉండేది. బ్రిటన్లో చిత్తడి నేలలు, నదీ వ్యవస్థలలో ఇది నివసించేది. నీటిలో, నేలపైనా సంచరించే సామర్థ్యం దీనికి ఉందని శాస్త్రవేత్తలు భావిస్తున్నారు. ఆ కాలంలో దీనికి పోటీ ఇచ్చే జీవులు పెద్దగా లేకపోవడంతో, చిన్న జీవులను, చేపలను వేటాడే అగ్రశ్రేణి మాంసాహారిగా ఇది జీవించింది.
మ్యూజియంలలోని పాత శిలాజాలను కొత్త పద్ధతుల్లో విశ్లేషించడం ద్వారా ప్రాచీన జీవుల గురించి ఎన్నో ఆసక్తికర విషయాలు తెలుసుకోవచ్చని ఈ అధ్యయనం నిరూపించింది. ఈ పరిశోధన వివరాలు 'పేలెంటియాలజీ' అనే అంతర్జాతీయ జర్నల్లో ప్రచురితమయ్యాయి.
