తిరుమల పవిత్రతపై వైసీపీ తీరుపై సాధు పరిషత్ ఆగ్రహం.. జూన్ 12న తిరుపతిలో మహాసభ!

తిరుమల శ్రీవారి ఆలయ పవిత్రతను కాపాడే విషయంలో వైసీపీ లక్ష్యంగా ఆంధ్రప్రదేశ్ సాధు పరిషత్ తీవ్రస్థాయిలో ధ్వజమెత్తడం ఇప్పుడు రాష్ట్రవ్యాప్తంగా సంచలనం రేపుతోంది. విశాఖపట్నం ప్రెస్ క్లబ్‌లో ఇతర సాధువులతో కలిసి నిర్వహించిన మీడియా సమావేశంలో ఆంధ్రప్రదేశ్ సాధు పరిషత్ అధ్యక్షుడు శ్రీనివాసానంద సరస్వతి మాట్లాడుతూ తీవ్ర వ్యాఖ్యలు చేశారు. గత వైసీపీ ప్రభుత్వం తిరుమల పవిత్రమైన కీర్తిని తీవ్రంగా దెబ్బతీసిందని మండిపడ్డారు. ఇప్పటికీ తిరుమల తిరుపతి దేవస్థానం (టీటీడీ) ప్రతిష్టను మసకబార్చేందుకు కుట్రపూరిత ప్రయత్నాలు జరుగుతున్నాయని ఆయన ఆరోపించారు.

టీటీడీ మాజీ చైర్మన్, వైసీపీ నేత భూమన కరుణాకర్ రెడ్డి వైఖరిని శ్రీనివాసానంద సరస్వతి తప్పుబట్టారు. కలియుగ వైకుంఠమైన తిరుమలపై బురదజల్లడమే పనిగా పెట్టుకున్నారా? అని ప్రశ్నించారు. ఆలయం లోపల ఏదో అనుమానాస్పదంగా జరుగుతోందంటూ వైసీపీ నాయకులు, వారి సోషల్ మీడియా హ్యాండిల్స్ చేస్తున్న అసత్య ప్రచారాలను ఆయన తీవ్రంగా ఖండించారు.

సాధువులను ‘దొంగలు’ అని, ‘టీడీపీ కార్యకర్తలు’ అని వైసీపీ నేతలు సంబోధించడంపై శ్రీనివాసానంద సరస్వతి తీవ్ర అభ్యంతరం వ్యక్తం చేశారు. జగన్ హయాంలో జరిగిన తప్పుల వల్లే గత ఎన్నికల్లో ప్రజలు, భక్తులు ఆ పార్టీని తిరస్కరించారని ఆయన గుర్తుచేశారు. ఇప్పటికైనా వైసీపీ నేతలు తమ పద్ధతిని మార్చుకోకపోతే, భవిష్యత్తులో ఆ పార్టీకి ఒక్క సీటు కూడా దక్కదని హెచ్చరించారు. తిరుమల పవిత్రతను కాపాడుకోవడానికి, ప్రస్తుతం జరుగుతున్న పరిణామాలపై చర్చించడానికి ఈ నెల 12న తిరుపతిలో సాధువులతో ఒక భారీ మహాసభను నిర్వహించబోతున్నట్లు ఈ సందర్భంగా ఆంధ్రప్రదేశ్ సాధు పరిషత్ ప్రకటించింది.